ന്യൂഡല്‍ഹി: വന്‍ പ്രതിഷേധം ഉയര്‍ത്തിപ്രതിപക്ഷം സമരപരിപാടികളുമായി മുമ്പോട്ട് പോകുമ്പോള്‍ തെരഞ്ഞെടുപ്പ് കമ്മീഷനെതിരേ വിമര്‍ശനവുമായി സുപ്രീംകോടതി ജഡ്ജിയും. കോടാനുകോടി ഇന്ത്യന്‍ പൗരന്മാരുടെ വോട്ടവകാശം നിഷേധിക്കുന്ന ഏതൊരു നടപടിയും സ്വേച്ഛാപരമായ ഒന്നാണെന്നും അത് ഭരണഘടനയുടെ കാതലായ തത്വത്തിന് മേലുള്ള പ്രഹരമാണെന്നും ജസ്റ്റിസ് ഉജ്ജല്‍ ഭുയാന്‍ പറഞ്ഞു.
ഹൈദരാബാദിലെ നല്‍സാര്‍ യൂണിവേഴ്‌സിറ്റി ഓഫ് ലോയില്‍ സംസാരിക്കവെയാണ് ഇക്കാര്യം പറഞ്ഞത്. വോട്ടവകാശമുള്ള പൗരന്മാര്‍, ഇല്ലാത്തവര്‍' എന്നിങ്ങനെ രണ്ട് വിഭാഗങ്ങളായി പൗരന്മാരെ ഇന്ത്യന്‍ ഭരണഘടന വിഭജിക്കുന്നില്ല.ഇന്ത്യന്‍ പൗരന്മാരുടെ വോട്ടവകാശം എടുത്തുകളയുന്ന ഏത് നടപടിയും ഘടനാപരമായ ഭരണഘടനാ ക്രമത്തിന് എതിരാണ്. ഒരു അധികാരികള്‍ക്കും അത് ചെയ്യാന്‍ കഴിയില്ല. ഒരു കോടതിക്കും അതിന് അനുമതി നല്‍കാനുമാകില്ലെന്നും പറഞ്ഞു.
തുല്യതയ്ക്കുള്ള അവകാശം ഉറപ്പുനല്‍കുന്ന ഭരണഘടനയുടെ 14-ാം അനുച്ഛേദത്തെയും, സാര്‍വത്രിക വോട്ടവകാശം വ്യവസ്ഥ ചെയ്യുന്ന 326-ാം അനുച്ഛേദ ത്തെയും ഇത്തരം നടപടികള്‍ ലംഘിക്കുന്നതായി അദ്ദേഹം വിശേഷിപ്പിച്ചു. എന്നാല്‍, തന്റെ പ്രസംഗത്തില്‍ അദ്ദേഹം പ്രത്യേകമായോ വ്യക്തിപരമായോ ഏതെങ്കിലും നടപടിയെയോ അധികാരികളെയോ എടുത്തു പറഞ്ഞില്ല. തിരഞ്ഞെടുപ്പ് കമ്മീഷന്റെ ഇലക്ടറല്‍ റോളുകളുടെ സ്‌പെഷ്യല്‍ ഇന്‍ടന്‍സീവ് റിവിഷനെ (എസ്.ഐ.ആര്‍) സുപ്രീംകോടതി ഏകകണ്ഠ്യമായി ശരിവെച്ച് നാല് മാസങ്ങള്‍ക്ക് ശേഷമാണ് ഈ പരാമര്‍ശങ്ങള്‍.
'ഒരു ഇന്ത്യന്‍ പൗരന്റെ വ്യക്തിത്വത്തില്‍ നിന്ന് വോട്ടവകാശത്തെയോ വോട്ടര്‍ പട്ടികയില്‍ ഉള്‍പ്പെടാനുള്ള അവകാശത്തെയോ വേര്‍പെടുത്തി കാണാനാകില്ല. അത് ശരീരത്തില്‍ നിന്ന് ആത്മാവിനെ വേര്‍പെടുത്തുന്നതുപോലെയാണ്,' ജസ്റ്റിസ് പറഞ്ഞു.
വ്യവസ്ഥകള്‍ പാലിക്കുന്നില്ലെന്ന് കമ്മീഷന് ബോധ്യപ്പെടാത്ത കേസുകള്‍ ഉചിതമായ അതോറിറ്റിയുടെ തീരുമാനത്തിനായി അയക്കാമെന്നും, ഇത്തരം നടപടികള്‍ തിരഞ്ഞെടുപ്പ് കമ്മീഷന്റെ അധികാര പരിധിയില്‍ വരുന്നതാണെന്നും മെയ് മാസത്തില്‍ സുപ്രീം കോടതി വിധിച്ചിരുന്നു. എസ്.ഐ.ആര്‍ ഒരു 'ദുഷ്ടലാക്കോടെയുള്ള' നടപടിയാണെന്ന് വിശേഷിപ്പിച്ച പ്രതിപക്ഷ പാര്‍ട്ടികള്‍, മൂന്ന് ഘട്ടങ്ങളിലായി കരട് വോട്ടര്‍ പട്ടികയില്‍ നിന്ന് ഒഴിവാക്കപ്പെട്ട ഏകദേശം 13 കോടി പേരുകള്‍ തിരികെ നല്‍കണമെന്ന് ആവശ്യപ്പെട്ടിട്ടുണ്ട്.
ഭരണഘടനയുടെ 326-ാം അനുച്ഛേദത്തെ 'ഒരിക്കലും തച്ചുടയ്ക്കാന്‍ കഴിയില്ല. ആരും ഭരണഘടനയ്ക്ക് അതീതരല്ല. ഒരു അധികാരികള്‍ക്കും അത് സാധ്യമല്ല. ഒരു കോടതിക്കും അതിന് അനുമതി നല്‍കാനാകില്ല.' അദ്ദേഹം മുന്നറിയിപ്പ് നല്‍കി. ഇന്ത്യന്‍ സുപ്രീം കോടതി വോട്ടവകാശത്തെ ഒരു മൗലികാവകാശമായി കണക്കാക്കിയിട്ടില്ലെങ്കിലും, അതൊരു ഭരണഘടനാ അവകാശമാണെന്ന് അംഗീകരിച്ചിട്ടുണ്ടെന്ന് അദ്ദേഹം പറഞ്ഞു.
Comments