കാനഡയിൽ ട്രാഫിക് തർക്കത്തിനിടെ കാൽനടയാത്രക്കാരനുമായി രൂക്ഷമായി ഏറ്റുമുട്ടിയ ഇന്ത്യൻ വംശജയായ യുവതി അറസ്റ്റിലായതായി റിപ്പോർട്ട്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് സംഭവം ശ്രദ്ധ നേടിയത്. റോഡിലെ തർക്കമാണ് പിന്നീട് വാക്കേറ്റത്തിലേക്കും ശാരീരിക ഏറ്റുമുട്ടലിലേക്കും നീങ്ങിയത്.
സംഭവത്തിനിടെ കാൽനടയാത്രക്കാരൻ ദൃശ്യങ്ങൾ മൊബൈൽ ഫോണിൽ പകർത്തുകയായിരുന്നു. ഇത് ശ്രദ്ധയിൽപ്പെട്ട യുവതി ഇയാളുടെ അടുത്തേക്ക് എത്തി വീഡിയോ പകർത്തുന്നതിനെ ചോദ്യം ചെയ്തു. തുടർന്ന് ഫോൺ പിടിച്ചെടുക്കാൻ ശ്രമിച്ചതോടെ ഇരുവരും തമ്മിലുള്ള തർക്കം കൂടുതൽ രൂക്ഷമായി.
തുടർന്ന് യുവാവിന്റെ ബാക്ക്പാക്കിൽ പിടിച്ച് ഇയാളെ റോഡിലൂടെ വലിച്ചിഴയ്ക്കാൻ യുവതി ശ്രമിച്ചതായാണ് റിപ്പോർട്ട്. സംഭവത്തിൽ ഇടപെട്ട കാൽഗറി പോലീസ് യുവതിയെ അറസ്റ്റ് ചെയ്തു. യുവതിക്കൊപ്പമുണ്ടായിരുന്ന ഭർത്താവാണ് വാഹനം ഓടിച്ചിരുന്നതെന്നും വാഹനത്തിന് സാധുവായ ഇൻഷുറൻസ് ഉണ്ടായിരുന്നില്ലെന്നും റിപ്പോർട്ടുകളുണ്ട്.
സംഭവത്തിന്റെ വീഡിയോ പുറത്തുവന്നതോടെ സമൂഹമാധ്യമങ്ങളിലും വലിയ ചർച്ചയാണ്. മറ്റൊരാൾ വീഡിയോ പകർത്തുന്നതിനെ തടയാൻ ശ്രമിച്ചതും തുടർന്ന് ഉണ്ടായ പെരുമാറ്റവുമാണ് പ്രധാനമായും വിമർശിക്കപ്പെടുന്നത്. അതേസമയം, സംഭവത്തിന്റെ മുഴുവൻ പശ്ചാത്തലം കൂടി പരിഗണിക്കണമെന്ന അഭിപ്രായവും ചിലർ പങ്കുവെച്ചിട്ടുണ്ട്.
Comments