ബെനിനെതിരായ മത്സരത്തില്‍ അര്‍ജന്റീനയെ 3-0ന്റെ വിജയത്തിലേക്ക് നയിച്ചുകൊണ്ട് ലയണല്‍ മെസ്സി അന്താരാഷ്ട്ര ഫുട്‌ബോളില്‍ നിന്ന് വിരമിച്ചു. എന്നാല്‍ ഫൈനല്‍ വിസില്‍ മുഴങ്ങിയതിന് ശേഷം, മെസ്സി തന്റെ അര്‍ജന്റീന സഹതാരങ്ങള്‍ക്കും ആരാധകര്‍ക്കും ഒരു മുന്നറിയിപ്പ് നല്‍കി.
പരാജയം ആഗ്രഹിക്കുന്ന വിമര്‍ശകരെ അതിജീവിക്കാനും ഒറ്റക്കെട്ടായി നില്‍ക്കാനും ഭാവിയിലെ അര്‍ജന്റീന താരങ്ങളോട് മെസ്സി അഭ്യര്‍ത്ഥിച്ചു. തന്റെ അന്താരാഷ്ട്ര കരിയറില്‍ ഉടനീളം പിന്തുണച്ച ലോകമെമ്പാടുമുള്ള ആരാധകര്‍ക്ക് അദ്ദേഹം നന്ദി പറഞ്ഞു. മത്സരത്തില്‍ രണ്ട് അസിസ്റ്റുകളും ഒരു പെനാല്‍റ്റി ഗോളും നേടിയ മെസ്സി, ഫുള്‍ ടൈം വിസിലിന് ശേഷം വികാരാധീനവും എന്നാല്‍ ആവേശകരവുമായ ഒരു പ്രസംഗം നടത്തി. തന്റെ പ്രസംഗത്തിനിടയില്‍, അര്‍ജന്റീന ടീമിനും ഭാവി തലമുറയ്ക്കും ആരാധകര്‍ക്കും അദ്ദേഹം ഒരു മുന്നറിയിപ്പ് നല്‍കി.
ദേശീയ ടീം വിജയിക്കുന്നത് കാണാന്‍ ആഗ്രഹിക്കാത്ത ചിലാളുകളുണ്ടെന്ന് അദ്ദേഹം ഓര്‍മ്മിപ്പിച്ചു. അന്താരാഷ്ട്ര ഫുട്‌ബോളില്‍ നിന്ന് മെസ്സി വിരമിക്കുമ്പോള്‍, അര്‍ജന്റീനയെ പുതിയ ഉയരങ്ങളിലെത്തിക്കാന്‍ ഭാവി തലമുറ നേതൃത്വം നല്‍കണമെന്നും, അര്‍ജന്റീന പരാജയപ്പെടണമെന്ന് ആഗ്രഹിക്കുന്നവരെ വിജയിക്കാന്‍ അനുവദിക്കരുതെന്നും അദ്ദേഹം പറഞ്ഞു.
മൈക്ക് കയ്യിലെടുത്ത് സംസാരിച്ച മെസ്സി, സ്റ്റേഡിയത്തിലുള്ള ആരാധകര്‍ക്കും ലോകമെമ്പാടുമുള്ളവര്‍ക്കും നന്ദി പറഞ്ഞുകൊണ്ടാണ് തന്റെ പ്രസംഗം ആരംഭിച്ചത്. ഐക്കണിക് നീലയും വെള്ളയും കുപ്പായം ധരിച്ച് ലോകത്ത് എവിടെ യാത്ര ചെയ്യുമ്പോഴും, തന്റെ അന്താരാഷ്ട്ര കരിയറില്‍ ഉടനീളം താന്‍ അനുഭവിച്ച പിന്തുണ തന്നെ സ്വന്തം നാട്ടില്‍ കളിക്കുന്നതുപോലെ തോന്നിപ്പിച്ചുവെന്ന് അദ്ദേഹം പങ്കുവെച്ചു.
'ആദ്യം തന്നെ, ഇവിടെ മോനുമെന്റലില്‍ ഉള്ള എല്ലാവര്‍ക്കും, രാജ്യത്തുടനീളവും ലോകത്തിന്റെ വിവിധ ഭാഗങ്ങളിലുമുള്ള എല്ലാ അര്‍ജന്റീനക്കാരോടും ഞാന്‍ നന്ദി പറയാന്‍ ആഗ്രഹിക്കുന്നു. ഈ വര്‍ഷങ്ങളില്‍ നിങ്ങളെല്ലാവരും എനിക്ക് നല്‍കിയ സ്‌നേഹവും ബഹുമാനവും എന്റെ ജീവിതകാലം മുഴുവന്‍ ഞാന്‍ ഹൃദയത്തില്‍ സൂക്ഷിക്കും. സാധാരണയില്‍ കൂടുതല്‍ ഞാന്‍ സംസാരിക്കുന്നുണ്ട്, പക്ഷേ യാഥാര്‍ത്ഥ്യം എന്തെന്നാല്‍ എനിക്ക് പോകാന്‍ തോന്നുന്നില്ല. നിങ്ങളുടെ മുന്നില്‍, ഈ ജഴ്‌സി ധരിച്ച് എനിക്ക് എക്കാലവും കളിക്കണം എന്നുണ്ട്, എന്നാല്‍ സമയം എല്ലാവര്‍ക്കും ഒരുപോലെയാണ്, അത് സാധ്യമല്ല.'' അദ്ദേഹം പറഞ്ഞു.
തന്റെ ആജീവനാന്ത സ്വപ്നങ്ങള്‍ സാക്ഷാത്കരിച്ചതിന്റെ സംതൃപ്തിയോടെയാണ് താന്‍ വിരമിക്കുന്നതെന്ന് മെസ്സി പറഞ്ഞു. ഫിഫ ലോകകപ്പ്, കോപ്പ അമേരിക്ക, ഫൈനലിസിമ തുടങ്ങി നിരവധി ബഹുമതികള്‍ നേടിയ 39 കാരനായ തനിക്ക് ഇനി അപൂര്‍ണ്ണമായ ആഗ്രഹങ്ങളൊന്നുമില്ല. എന്നിരുന്നാലും, ആരാധകര്‍ക്കും സഹതാരങ്ങള്‍ക്കും അര്‍ജന്റീനയെ പ്രതിനിധീകരിക്കാന്‍ പോകുന്നവര്‍ക്കും മെസ്സി കര്‍ശനമായ ഒരു മുന്നറിയിപ്പ് നല്‍കി. ദേശീയ ടീം വീഴണമെന്ന് ആഗ്രഹിക്കുന്ന വിമര്‍ശകരും എതിരാളികളും ഉണ്ടെന്ന് അദ്ദേഹം ഓര്‍മ്മിപ്പിച്ചു.
'ലോകകപ്പ് വീണ്ടും നേടണമെന്നൊരു സ്വപ്നമുണ്ടായിരുന്നു, പക്ഷേ അത് നടന്നില്ല. ഞങ്ങള്‍ പരമാവധി ശ്രമിച്ചു, പക്ഷേ ഞങ്ങള്‍ തീര്‍ത്തും അവശരായിരുന്നു. ഇനി കഠിനമായ നിമിഷങ്ങള്‍ വരും, എന്നാല്‍ ആ സമയങ്ങളില്‍ നമ്മള്‍ എന്നത്തേക്കാളും കൂടുതല്‍ ഒറ്റക്കെട്ടായി നില്‍ക്കണം. നമ്മള്‍ കൂടുതല്‍ ഐക്യത്തോടെ നില്‍ക്കണം, കാരണം ദേശീയ ടീം മോശമായി വരണമെന്ന് ആഗ്രഹിക്കുന്ന നിരവധി ആളുകളുണ്ട് - അവര്‍ക്ക് ആ സന്തോഷം നമ്മള്‍ നല്‍കരുത്. ദൈവത്തിന് നന്ദി, ഞാന്‍ ഒരു അര്‍ജന്റീനക്കാരനാണ്. വളരെ നന്ദി. നിങ്ങളെ എല്ലാവരെയും ഞാന്‍ സ്‌നേഹിക്കുന്നു.'' അദ്ദേഹം ഉപസംഹരിച്ചു.
Comments