മുംബൈയിലെ കോടികൾ വിലമതിക്കുന്ന ഫ്ലാറ്റുകളുള്ള ആഡംബര ഹൗസിങ് സൊസൈറ്റിയിലെത്തിയ യുവതിയെ ഞെട്ടിച്ചത് അവിടുത്തെ ശൂന്യതയായിരുന്നു. തിങ്കളാഴ്ച രാത്രി സൊസൈറ്റിയിലെത്തിയ റുചി ദുബെ എന്ന യുവതി, വലിയ കെട്ടിടങ്ങളും വിലകൂടിയ വീടുകളും ഉണ്ടായിട്ടും പരിസരത്ത് ആളുകളെ കാണാനില്ലെന്ന് ചൂണ്ടിക്കാട്ടി വീഡിയോ പങ്കുവെച്ചു. ഒഴിഞ്ഞുകിടക്കുന്ന പൂന്തോട്ടവും തെളിയാത്ത ലൈറ്റുകളും ആളുകളില്ലാത്ത പാർക്കിങ് ഏരിയയുമാണ് വീഡിയോയിൽ അവർ കാണിച്ചത്.
കോടികൾ വിലയുള്ള ഫ്ലാറ്റുകളാണ് ഇവിടെ ഉള്ളതെന്നും വാടക പോലും ലക്ഷങ്ങൾ വരുമെന്നും റുചി പറയുന്നു. എന്നാൽ ഇത്രയും പണം മുടക്കി വീടും അതിനോടനുബന്ധിച്ചുള്ള സൗകര്യങ്ങളും സ്വന്തമാക്കിയവർക്ക് അവ ആസ്വദിക്കാൻ പോലും സമയം കിട്ടുന്നുണ്ടോ എന്നായിരുന്നു അവരുടെ ചോദ്യം. ജോലി ചെയ്യാനും വായ്പ തിരിച്ചടയ്ക്കാനുമായി ജീവിതത്തിന്റെ ഭൂരിഭാഗവും മാറ്റിവെക്കുമ്പോൾ വീടിനൊപ്പം ലഭിക്കുന്ന സൗകര്യങ്ങൾ ആസ്വദിക്കാൻ സമയം ബാക്കിയാകുന്നില്ലെന്നാണ് അവർ ചൂണ്ടിക്കാട്ടിയത്.
ചെറുപ്പത്തിൽ തന്നെ വലിയ ഹോം ലോൺ എടുക്കുന്നതിനെക്കുറിച്ചും റുചി മുന്നറിയിപ്പ് നൽകി. വർഷങ്ങളോളം വായ്പ തിരിച്ചടച്ചുകൊണ്ടിരിക്കുമ്പോൾ ജീവിതത്തിലെ പ്രധാനപ്പെട്ട സമയവും സ്വാതന്ത്ര്യവും നഷ്ടപ്പെടാൻ സാധ്യതയുണ്ടെന്നാണ് അവരുടെ വാദം. വീട് വാങ്ങുന്നതോ മറ്റേതെങ്കിലും വലിയ സാമ്പത്തിക തീരുമാനമെടുക്കുന്നതോ ആണെങ്കിൽ അതിന്റെ ദീർഘകാല പ്രത്യാഘാതങ്ങൾ കൂടി ആലോചിച്ച ശേഷം മാത്രം തീരുമാനിക്കണമെന്നും അവർ യുവാക്കളോട് ആവശ്യപ്പെട്ടു.
‘ഹോം ലോൺ കെണിയിൽ’ വീഴരുതെന്ന റുചിയുടെ വാക്കുകൾ സമൂഹമാധ്യമങ്ങളിൽ വലിയ ചർച്ചയ്ക്കാണ് വഴിവെച്ചത്. സാമ്പത്തിക സ്വാതന്ത്ര്യവും ജീവിതം ആസ്വദിക്കാനുള്ള സമയവും പ്രധാനമാണെന്ന അഭിപ്രായവുമായി നിരവധി പേർ രംഗത്തെത്തി. അതേസമയം, ഒരു തിങ്കളാഴ്ച രാത്രിയിലെ കാഴ്ച മാത്രം അടിസ്ഥാനമാക്കി ഒരു ഹൗസിങ് സൊസൈറ്റിയിലെ താമസക്കാരുടെ ജീവിതത്തെ വിലയിരുത്താനാകില്ലെന്നും ചിലർ അഭിപ്രായപ്പെട്ടു.
Comments