കൊച്ചി: കളമശ്ശേരി കൂട്ടബലാത്സംഗക്കേസില്‍ പിടിയിലായ ഒന്നും മൂന്നും പ്രതികളുമായി ഇന്ന് തെളിവെടുപ്പ് നടത്തും. സ്പായിലും ബലാത്സംഗം നടന്ന ലോഡ്ജിലും എത്തിക്കും. ഇന്നലെ പിടിയിലായ കേസിലെ മറ്റു രണ്ടു പ്രതികളായ സഞ്ജുവും ശരണ്യയും റിമാന്റിലാണ്. കഴിഞ്ഞ ദിവസം ആശുപത്രിയില്‍ എത്തി യുവതിയുടെ മൊഴി പോലീസ് രേഖപ്പെടുത്തിയിരുന്നു. ഇതിന് പിന്നാലെയാണ് തെളിവെടുപ്പ്.
സംഭവത്തില്‍ ശാസ്ത്രീയ തെളിവുകളും ശേഖരിക്കും. സ്പായിലെയും ലോഡ്ജിലെയും സിസിടിവി ദൃശ്യങ്ങളും ശേഖരിക്കും. സെക്യൂരിറ്റി ജീവനക്കാരില്‍ നിന്നും മൊഴിയെടുത്തിട്ടുണ്ട്. കര്‍ണാടകയിലേക്ക് കടക്കാന്‍ ശ്രമിക്കുന്നതിനിടെ ഇന്നലെയാണ് സഞ്ജു, ശരണ്യ എന്നിവര്‍ പൊലീസ് പിടിയിലായത്. തന്നെ ഏറ്റവും കൂടുതല്‍ ഉപദ്രവിച്ചത് ശരണ്യയാണ് എന്ന് അതിജീവിത മൊഴി നല്‍കിയിരുന്നു. അറസ്റ്റിലായ നാലു പ്രതികളെയും യുവതി തിരിച്ചറിഞ്ഞു. അമ്മുവെന്ന് അറിയപ്പെടുന്ന ശരണ്യയാണ് ഏറ്റവും ക്രൂരമായി പീഡിപ്പിച്ചതെന്നാണ് യുവതി നല്‍കിയിരിക്കുന്ന മൊഴി.
പ്രതി ശരണ്യ സ്പാ ജോലിക്ക് എത്തിയത് ആറുമാസങ്ങള്‍ക്കു മുന്‍പാണ്. കൂട്ട ബലാത്സംഗത്തിന്റെ കാവല്‍ക്കാരനായിരുന്നു പിടിയിലായ സഞ്ജു. ഇരുവരും മുഖ്യപ്രതി ശ്രീരാജിന്റെ സുഹൃത്തുക്കളാണ്. ശരണ്യയ്ക്കും സഞ്ജയ്ക്കും മുഖ്യപ്രതി ശ്രീരാജുമായുള്ള ഇടപാടുകളിലും വിശദമായ പരിശോധന നടത്തും. കേസില്‍ ഇവര്‍ നാലുപേര്‍ മാത്രമല്ലെന്നും മറ്റു രണ്ടുപേര്‍ കൂടി ഉണ്ടാകാമെന്നാണ് പോലീസ് സംശയിക്കുന്നത്. പുലര്‍ച്ചെ ഇവിടെയെത്തിയ മറ്റു രണ്ടുപേര്‍ക്കായും അന്വേഷണം നടക്കുന്നുണ്ട്.
കേസില്‍ കൂടുതല്‍ പ്രതികള്‍ ഉണ്ടെന്നാണ് അതിജീവിതയുടെ ഭര്‍ത്താവിന്റെ ആരോപണം. എംഡിഎംഎ അടക്കമുള്ള ലഹരി യുവതിയുടെ ശരീരത്തില്‍ എത്തിയിട്ടുണ്ട്. ലഹരി വലിപ്പിക്കുകയും ഭക്ഷണത്തില്‍ കലര്‍ത്തി നല്‍കുകയും ചെയ്തിട്ടുള്ളതായിട്ടാണ് വിവരം. പരിശോധനയില്‍ യുവതിയുടെ ആന്തരീകാവയവങ്ങള്‍ക്ക് പ്രശ്‌നമുണ്ടെന്ന് ഭര്‍ത്താവ് പറഞ്ഞു. അതിജീവിതയുടെ വിശദമായ മൊഴി പോലീസ് രേഖപ്പെടുത്തിയിട്ടുണ്ട്. അറസ്റ്റിലായ ശരണ്യയടക്കം ക്രൂരമായ ലൈംഗിക പീഡനം നടത്തിയെന്ന് യുവതി മൊഴി നല്‍കി.
തൃക്കാക്കര എസിപി യുടെ നേതൃത്വത്തിലാണ് മൊഴിയെടുത്തത്. യുവതി കളമശ്ശേരി മെഡിക്കല്‍ കോളജ് ആശുപത്രിയില്‍ കഴിയുകയാണ്. പോലീസ് സ്‌റ്റേഷന്റെ രണ്ടുകി.മീ. ദൂരത്തിലാണ് സ്പായും ലോഡ്ജും പ്രവര്‍ത്തിക്കുന്നത്. സ്്പായ്ക്ക് പുറമേ ലോഡ്ജും സംശയാസ്പദമായി പ്രവര്‍ത്തിക്കുന്നതാണ്. അനാശാസ്യ പ്രവര്‍ത്തനങ്ങള്‍ പോലെയുള്ള കാര്യങ്ങള്‍ ലോഡ്ജ് കേന്ദ്രീകരിച്ച് നടക്കുന്നുണ്ടെന്നാണ് പോലീസിന്റെ സംശയം.
Comments