ന്യൂഡല്‍ഹി: ഖജനാവ് കൊള്ളയടിച്ചവര്‍ തന്നെ ഒരിക്കലും സ്‌നേഹിക്കില്ലെന്നും അഞ്ച് ലക്ഷം കോടി രൂപ തെറ്റായ കൈകളില്‍ പോകുന്നതില്‍ നിന്ന് താന്‍ തടഞ്ഞെന്നും പ്രധാനമന്ത്രി നരേന്ദ്രമോദി. തെരഞ്ഞെടുപ്പ് കമ്മീഷനെതിരേ ഡല്‍ഹിയില്‍ ശക്തമായ പ്രതിഷേധം അരങ്ങേറുന്നതിനിടയിലാണ് പ്രതിപക്ഷത്തിന് ശക്തമായ മറുപടി നല്‍കിയത്.
ആരെത്ര ബഹളം വച്ചാലും തന്റെ പ്രവര്‍ത്തനം തുടരുമെന്നും പറഞ്ഞു. പത്താമത് മൊബൈല്‍ കോണ്‍ഗ്രസ് ഉദ്ഘാടനം ചെയ്ത് സംസാരിക്കുമ്പോഴാണ് പ്രധാനമന്ത്രി പ്രതിപക്ഷത്തിന് പരോക്ഷമായി മറുപടി നല്‍കിയത്. തെരഞ്ഞെടുപ്പ് കമ്മീഷനെതിരേ നടക്കുന്ന പ്രതിപക്ഷപ്രതിഷേധം ലക്ഷ്യം വെയ്ക്കുന്നത് തനിക്കെതിരേ ആണെന്ന് തിരിച്ചറിഞ്ഞാണ് പ്രതികരണം. കഴിഞ്ഞ ദിവസങ്ങളില്‍ ഒന്നും തന്നെ വിഷയത്തില്‍ യാതൊരു മറുപടിയും മോദി പറഞ്ഞിരുന്നില്ല. ഖജനാവ് കൊള്ളയടിച്ചവര്‍ തന്നെ സ്നേഹിക്കുമെന്ന് നിങ്ങള്‍ കരുതുന്നുണ്ടോ എന്ന് സദസിനോട് മോദി ചോദിച്ചു.
കയ്യടിയോടെയാണ് സദസ് മോദിയുടെ വാക്കുകള്‍ ഏറ്റെടുത്തത്. അതേസമയം ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്നലെ ശക്തമായ പ്രതിപക്ഷ പ്രതിഷേധം പ്രതിപക്ഷം ജന്തര്‍ മന്തറില്‍ നടത്തിയിരുന്നു. ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയെയും പ്രിയങ്കാ ഗാന്ധിയെയും പൊലീസ് ബലം പ്രയോഗിച്ച് വാഹനത്തിലേക്ക് മാറ്റിയത് സംഘര്‍ഷത്തിന് കാരണമായി മാറിയിരുന്നു.
Comments