കൊച്ചി: സ്പായിലെ കൂട്ടബലാത്സംഗക്കേസില്‍ ഒന്നാംപ്രതി ശ്രീരാജ് കൂടുതല്‍ പേരെ അഭിമുഖത്തിന് ക്ഷണിച്ചതായി കണ്ടെത്തല്‍. ശ്രീരാജ് ഉള്‍പ്പെട്ട പെണ്‍വാണിഭ മാഫിയ കൂടുതല്‍ പേരെ വലയിലാക്കിയിട്ടുണ്ടോ എന്ന് പരിശോധിക്കുകയാണ് പോലീസ്. ഇയാള്‍ 15 പേരെ അഭിമുഖത്തിന് ക്ഷണിച്ചതായുള്ള വിവരം പോലീസിന് കിട്ടിയിട്ടുണ്ട്.
ശ്രീരാജിന്റെ മൊബൈല്‍ ഫോണില്‍ നടത്തിയ പരിശോധനയില്‍ കൂടുതല്‍ പേരെ ഇയാള്‍ ജോലിക്കായി അഭിമുഖത്തിന് വിളിച്ചതായി കണ്ടെത്തിയിട്ടുണ്ട്. ഇവരുമായി ഇയാള്‍ നടത്തിയ വാട്‌സാപ്പ് ചാറ്റുകളാണ് പോലീസിന് കിട്ടിയിരിക്കുന്നത്. ഇവരുടെ വിവരങ്ങളും പോലീസ് ശേഖരിച്ചിട്ടുണ്ട്. ഇവരില്‍ ആരെങ്കിലും പീഡനത്തിനിരയായിട്ടുണ്ടോ എന്നാണ് പോലീസ് പരിശോധിക്കുന്നത്. പരാതിയുമായി ഇവരില്‍ ആരെങ്കിലും എത്തിയാല്‍ കൂടുതല്‍ കേസെടുക്കും.
സ്പായുടെ മറവില്‍ ഇവര്‍ നടത്തിയിരുന്നത് സെക്‌സ്‌റാക്കറ്റ് ആണെന്ന് വ്യക്തമായിട്ടുണ്ട്. പ്രതി ശരണ്യയുടെ മൊബൈലും പോലീസ് പരിശോധിച്ചു. തന്നെ ലൈംഗികമായി ഏറ്റവും കൂടുതല്‍ ഉപദ്രവിച്ചത് ശരണ്യയാണെന്നാണ് യുവതി പോലീസിന് നല്‍കിയിരിക്കുന്ന മൊഴി. സ്പായിലേക്കുള്ള ജോലിക്ക് എന്ന പേരില്‍ അഭിമുഖത്തിന് ക്ഷണിക്കുകയും മയക്കുമരുന്ന് നല്‍കി കൂട്ടബലാത്സംഗം നടത്തുകയുമായിരുന്നു.
കേസില്‍ മറ്റു സ്പാ ജീവനക്കാരുടെ പശ്ചാത്തലവും പരിശോധിക്കും. ഇവര്‍ക്ക് ക്രിമിനല്‍ പശ്ചാത്തലം ഉണ്ടോ എന്നാണ് പരിശോധന. കേസില്‍ പ്രതികളുടെ സാമ്പത്തീക ഇടപാടുകളും പരിശോധിക്കും. ശ്രീരാജിന്റെയും സ്പായുടെയും ബാങ്ക് അക്കൗണ്ടുകളും മരവിപ്പിക്കും.
Comments