കോളേജ് കാലത്തെ സന്തോഷവും അച്ഛന്റെ കരുതലും ഓർത്തെടുത്ത യുവാവിന്റെ കുറിപ്പ് സമൂഹമാധ്യമങ്ങളിൽ ശ്രദ്ധ നേടുന്നു. ഇരുപതാം വയസ്സിന് ശേഷമുള്ള ജീവിതം ദുരിതപൂർണമായിരുന്നുവെന്നും പണമുണ്ടായാലും അച്ഛൻ നൽകുന്ന സുരക്ഷിതത്വവും മനസ്സമാധാനവും തിരിച്ചുകിട്ടില്ലെന്നും 39-കാരനായ സുന്ദർദീപ് എക്സിൽ പങ്കുവെച്ച കുറിപ്പിൽ പറയുന്നു. കോളേജ് ഫീസ് അച്ഛൻ നൽകിയിരുന്ന കാലമായിരുന്നു തന്റെ ജീവിതത്തിലെ ഏറ്റവും നല്ല നാളുകളെന്നും അദ്ദേഹം ഓർത്തെടുത്തു.
കോളേജ് കാലത്ത് സംഗീതവും തനിക്കിഷ്ടപ്പെട്ട പ്ലേലിസ്റ്റുകളും ആസ്വദിച്ചിരുന്നതിനെക്കുറിച്ചും സുന്ദർദീപ് കുറിച്ചു. ഹോസ്റ്റലിൽ 63 ശതമാനം മാത്രം മൊത്തം മാർക്ക് നേടിയിട്ടും ജോലി ലഭിച്ച ഏക വിദ്യാർഥിയെന്ന നിലയിൽ തനിക്കൊരു പ്രത്യേക സ്ഥാനം നേടാനായെന്നും അദ്ദേഹം പറഞ്ഞു. സഹോദരനൊപ്പം ഡിവിഡി പ്ലെയറിൽ ഭഗവന്ത് മാനും ഭോട്ടു ഷായും അവതരിപ്പിച്ച കോമഡി പരിപാടികൾ കണ്ടിരുന്ന ഓർമകളും കുറിപ്പിൽ പങ്കുവെച്ചിട്ടുണ്ട്. അന്നത്തെ ചെറിയ സന്തോഷങ്ങളാണ് ഇപ്പോൾ വിലപ്പെട്ട ഓർമകളായി മാറിയതെന്നും അദ്ദേഹം പറയുന്നു.
ഇരുപതാം വയസ്സിന് ശേഷം കാലം എത്ര വേഗത്തിലാണ് കടന്നുപോയതെന്ന് തിരിച്ചറിയാൻ പോലും കഴിഞ്ഞില്ലെന്നും 39 വയസ്സിലെത്തിയപ്പോഴേക്കും ജീവിതം ഏറെ മാറിയെന്നും സുന്ദർദീപ് കുറിച്ചു. പണംകൊണ്ട് സന്തോഷം വാങ്ങാനാകില്ലെന്നും അച്ഛൻ ഭക്ഷണം നൽകാനും സംരക്ഷിക്കാനും ഒപ്പമുണ്ടെന്ന വിശ്വാസം നൽകുന്ന മനസ്സമാധാനത്തിന് പകരം മറ്റൊന്നുമില്ലെന്നും അദ്ദേഹം അഭിപ്രായപ്പെട്ടു. ഉത്തരവാദിത്വങ്ങളും ജീവിതച്ചെലവുകളും വർധിക്കുന്ന പ്രായപൂർത്തിയായ ജീവിതത്തിൽ പഴയകാലത്തെ ലാളിത്യവും സുരക്ഷിതത്വവും നഷ്ടമാകുന്നതിന്റെ വേദനയാണ് കുറിപ്പിൽ പ്രതിഫലിക്കുന്നത്.
കുറിപ്പ് വൈറലായതോടെ നിരവധി പേരാണ് സ്വന്തം അനുഭവങ്ങളും അഭിപ്രായങ്ങളും പങ്കുവെച്ചത്. മുതിർന്നവരുടെ ജീവിതത്തിലെ ഉത്തരവാദിത്വങ്ങളെയാണ് ഒരാൾ 'അഡൾട്ടിങ്' എന്ന് വിശേഷിപ്പിച്ചത്. മറ്റൊരാൾ 2007ന് ശേഷം എന്തോ മാറിയെന്നും പഴയ സന്തോഷം തിരിച്ചുകിട്ടിയില്ലെന്നും പ്രതികരിച്ചു. അതേസമയം, ജീവിതത്തിൽ വിജയിച്ചുവെന്നായിരുന്നു മറ്റൊരു കമന്റ്. കോളേജ് കാലത്തെ സൗഹൃദങ്ങളും കുടുംബത്തിന്റെ പിന്തുണയും ചെറിയ സന്തോഷങ്ങളും എത്രത്തോളം വിലപ്പെട്ടതാണെന്ന് ഓർമിപ്പിക്കുന്നതാണ് സുന്ദർദീപിന്റെ കുറിപ്പ്.
Comments