നടന്‍, അവതാരകന്‍, ആര്‍ജെ, ഡബ്ബിങ് ആര്‍ട്ടിസ്റ്റ് എന്നീ നിലകളിലെല്ലാം മലയാളികള്‍ക്ക് സുപരിചിതനായ വ്യക്തിയാണ് മിഥുന്‍ രമേഷ്. ഇപ്പോഴിതാ, മലയാളത്തിന്റെ മെഗാസ്റ്റാര്‍ മമ്മൂട്ടിക്കൊപ്പമുളള ചിത്രങ്ങള്‍ ഇന്‍സ്റ്റഗ്രാമിലൂടെ പങ്കുവെച്ചിരിക്കുകയാണ് താരം. ചിത്രങ്ങള്‍ക്കൊപ്പമുളള രസകരമായ കുറിപ്പും ശ്രദ്ധ നേടുകയാണ്. മമ്മൂട്ടിയുടെ സമാനമായ ലുക്കും സ്റ്റൈലും കൊണ്ടുവരാന്‍ ശ്രമിച്ചതിനെക്കുറിച്ചാണ് മിഥുന്‍ പങ്കുവെച്ചത്.
'ബോസിന്റെ സ്റ്റൈല്‍ ഒന്ന് അനുകരിക്കാന്‍ നോക്കിയതാണ്, പക്ഷേ ഓരോ തവണയും അദ്ദേഹം ആ നിലവാരം കൂടുതല്‍ ഉയര്‍ത്തിക്കൊണ്ടേയിരിക്കുന്നു- മമ്മൂക്കയുടെ ആ ഫാഷന്‍ ഉയരങ്ങളിലേക്ക് എത്താന്‍ ഞാനിപ്പോഴും ശ്രമിച്ചുകൊണ്ടിരിക്കുകയാണ്,' എന്നാണ് ചിത്രങ്ങള്‍ക്കൊപ്പം മിഥുന്‍ കുറിച്ചത്.
മലയാള സിനിമയില്‍ ചെറിയ ചെറിയ വേഷങ്ങള്‍ ചെയ്തുകൊണ്ടാണ് മിഥുന്‍ ലൈം ലൈറ്റിലേക്ക് എത്തിയത്. വെട്ടം, ലൈഫ് ഈസ് ബ്യൂട്ടിഫുള്‍, റണ്‍വെ തുടങ്ങിയ സിനിമകളിലെ മിഥുന്റെ കഥാപാത്രങ്ങള്‍ ഏറെ ശ്രദ്ധിക്കപ്പെട്ടവയായിരുന്നു. ദുബായില്‍ കുടുംബസമേതം സെറ്റില്‍ഡായ മിഥുന്‍ വളരെ വിരളമായി മാത്രമാണ് സിനിമകളില്‍ അഭിനയിക്കുന്നത്. പക്ഷെ ഭാര്യ ലക്ഷ്മിക്കൊപ്പം മിഥുന്‍ ചെയ്യുന്ന റീലുകളെല്ലാം ഹിറ്റും വൈറലുമാണ്.
Comments