ബോകസ് ഓഫീസില്‍ ചരിത്രം സൃഷ്ടിച്ച് മുന്നേറുന്ന ബോളിവുഡ് ചിത്രം 'ദൃശ്യം 3: ദ് കണ്‍ക്ലൂഷനെ' പ്രശംസിച്ച് നടന്‍ മോഹന്‍ലാല്‍. ഈ യാത്രയ്ക്ക് അനുയോജ്യമായ അവസാനം കണ്ടെത്തിയ രീതിയെ അഭിനന്ദിക്കുന്നുവെന്നായിരുന്നു മോഹന്‍ലാല്‍ പറഞ്ഞത്. കൂടാതെ മറ്റ് അഭിനേതാക്കളെയും താരം അഭിനന്ദിച്ചു.
"ഞാന്‍ 'ദൃശ്യം 3: ദ് കണ്‍ക്ലൂഷന്‍' കണ്ടു. ജനപ്രിയമായ ഈ യാത്രയ്ക്ക് അനുയോജ്യമായ അവസാനം കണ്ടെത്തിയ രീതിയെ ഞാന്‍ അഭിനന്ദിക്കുന്നു. അഭിഷേക് പഥക്, കുമാര്‍ മംഗത് പഥക്, അജയ് ദേവ്ഗണ്‍ കൂടാതെ ചിത്രത്തിന്റെ എല്ലാ അഭിനേതാക്കള്‍ക്കും അണിയറപ്രവര്‍ത്തകര്‍ക്കും എന്റെ അഭിനന്ദനം. വളരെ നന്നായി ചെയ്തു" എന്നായിരുന്നു മോഹന്‍ലാലിന്റെ വാക്കുകൾ.
ഒക്‌ടോബര്‍ രണ്ടിനാണ് ചിത്രം തിയേറ്ററുകളിലെത്തിയത്. ദൃശ്യം ഹിന്ദിയുടെ ആദ്യ രണ്ട് ഭാഗങ്ങള്‍ക്കു ലഭിച്ച കളക്ഷനുകളെ പിന്നിലാക്കി മികച്ച പ്രതികരണം നേടി മുന്നേറുകയാണ് ചിത്രം.
അജയ് ദേവ്ഗണിന് പുറമേ ജയ്ദീപ് അഹ്‌ലാവത്, പ്രകാശ് രാജ്, തബു, ശ്രിയ ശരൺ, രജത് കപൂർ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. അഭിഷേക് പഥക്, ആമിൽ കിയാൻ ഖാൻ, പർവേസ് ഷെയ്ഖ് എന്നിവർ ചേർന്ന് രചിച്ച ഈ ചിത്രം നിർമിച്ചിരിക്കുന്നത് അലോക് ജെയിൻ, അജിത് അന്ധാരെ, കുമാർ മംഗത് പഥക്, അഭിഷേക് പഥക് എന്നിവർ ചേർന്നാണ്.
മലയാളത്തില്‍ മോഹന്‍ലാലിനെ നായകനാക്കി ജീത്തു ജോസഫ് സംവിധാനം ചെയ്ത 'ദൃശ്യം 3' യുടെ മേക്കിങ്ങിനെ വെല്ലുന്നതാണ് ഹിന്ദി പതിപ്പെന്നാണ് സോഷ്യല്‍ മീഡിയയുടെ അഭിപ്രായം. മലയാളവുമായി യാതൊരു ബന്ധവുമില്ലാത്ത തിരക്കഥയാണ് ഹിന്ദി പതിപ്പിന്റേത്.
Comments