ഐടി മേഖലയിൽ ജോലി നേടാൻ ശ്രമിക്കുന്നവർ നേരിടുന്ന കടുത്ത മത്സരത്തിന്റെ ചിത്രം പങ്കുവെച്ച് സമൂഹമാധ്യമങ്ങളിൽ ശ്രദ്ധനേടി ഒരു ഉദ്യോഗാർഥി. പ്രാഥമിക യോഗ്യതകൾ മാത്രം ആവശ്യമായ എൻട്രി ലെവൽ ഐടി സപ്പോർട്ട് ജോലിക്ക് രണ്ടാഴ്ചയ്ക്കിടെ 16,000-ത്തിലധികം പേർ അപേക്ഷിച്ചതാണ് ഉദ്യോഗാർഥിയെ അമ്പരപ്പിച്ചത്. ജോലി തേടുന്നവരുടെ എണ്ണം വർധിക്കുന്നതും അവസരങ്ങൾക്കായുള്ള മത്സരം മുറുകുന്നതും ചൂണ്ടിക്കാട്ടിയുള്ള കുറിപ്പ് ഇപ്പോൾ ചർച്ചയാകുകയാണ്. യോഗ്യതയുള്ളവർക്ക് പോലും ജോലി കണ്ടെത്തുക പ്രയാസകരമാകുന്ന സാഹചര്യം എത്രത്തോളം രൂക്ഷമാണെന്നതിന്റെ ഉദാഹരണമായാണ് ഈ സംഭവം വിലയിരുത്തപ്പെടുന്നത്.
ഒരു ഹൈസ്കൂൾ വിദ്യാഭ്യാസ യോഗ്യതയും പൂജ്യം മുതൽ രണ്ടുവർഷം വരെയുള്ള പ്രവൃത്തിപരിചയവും മാത്രം ആവശ്യമായ ജോലിയിലേക്കാണ് ഇത്രയധികം അപേക്ഷകൾ എത്തിയത്. രണ്ടാഴ്ചയ്ക്കുള്ളിൽ 16,000-ത്തിലധികം പേർ അപേക്ഷിച്ചപ്പോൾ, അവസാന 24 മണിക്കൂറിനിടെ മാത്രം 600-ലധികം അപേക്ഷകൾ ലഭിച്ചെന്നും ഉദ്യോഗാർഥി സമൂഹമാധ്യമങ്ങളിൽ പങ്കുവെച്ച കുറിപ്പിൽ പറയുന്നു. തുടക്കക്കാർക്ക് അനുയോജ്യമായ ജോലി എന്ന നിലയിൽ പരിഗണിക്കപ്പെട്ട അവസരത്തിലേക്ക് ഇത്രയധികം പേർ എത്തിയതാണ് ശ്രദ്ധ നേടിയത്.
ആയിരക്കണക്കിന് യോഗ്യതയുള്ളവർ അടിസ്ഥാന ജോലികൾക്കുപോലും പരസ്പരം മത്സരിക്കേണ്ടിവരുന്ന സാഹചര്യം ഒരു ഡിസ്റ്റോപ്പിയൻ യാഥാർഥ്യത്തിലേക്ക് നീങ്ങുന്നതുപോലെയാണെന്നും ഉദ്യോഗാർഥി അഭിപ്രായപ്പെട്ടു. ബിരുദം നേടുകയും വിവിധ സർട്ടിഫിക്കേഷനുകൾ സ്വന്തമാക്കുകയും പ്രവൃത്തിപരിചയം നേടുകയും ചെയ്തിട്ടും ജോലി ഉറപ്പാക്കാൻ കഴിയാത്ത അവസ്ഥയാണോ നിലവിലുള്ളതെന്ന ആശങ്കയും കുറിപ്പിലൂടെ പങ്കുവെച്ചു. ലിങ്ക്ഡ്ഇനിൽ ലഭ്യമായ വിവരങ്ങൾ പ്രകാരം അപേക്ഷകരിൽ 25 ശതമാനം പേർ സീനിയർ തലത്തിലുള്ള പ്രൊഫഷണലുകളാണെന്നതും അദ്ദേഹം ചൂണ്ടിക്കാട്ടി. തുടക്കക്കാർക്ക് മാത്രമല്ല, വർഷങ്ങളുടെ പരിചയമുള്ളവർക്കും ജോലി തേടുന്നതിൽ വെല്ലുവിളികൾ നേരിടേണ്ടിവരുന്നുവെന്നതാണ് ഇതിലൂടെ വ്യക്തമാകുന്നത്.
കുറിപ്പ് ശ്രദ്ധ നേടിയതോടെ തൊഴിൽവിപണിയിലെ സാഹചര്യങ്ങളെക്കുറിച്ച് നിരവധി പേരാണ് പ്രതികരണങ്ങളുമായി എത്തിയത്. ഐടി മേഖലയിലെ തുടക്കജോലികൾക്കുപോലും ബിരുദവും ഒന്നിലധികം സർട്ടിഫിക്കേഷനുകളും ആവശ്യപ്പെടുന്ന സാഹചര്യം ചിലർ ചൂണ്ടിക്കാട്ടി. അതേസമയം, അപേക്ഷകരിൽ എല്ലാവരും ജോലിക്ക് ആവശ്യമായ യോഗ്യതകൾ ഉള്ളവരായിരിക്കണമെന്നില്ലെന്നും ചിലർ അഭിപ്രായപ്പെട്ടു. പഠനകാലത്ത് തന്നെ തൊഴിൽബന്ധങ്ങൾ വളർത്തിയെടുക്കുന്നതും അവസരങ്ങൾ കണ്ടെത്തുന്നതിൽ പ്രധാനമാണെന്ന അഭിപ്രായങ്ങളും ഉയർന്നു. എൻട്രി ലെവൽ ജോലിക്ക് ഇത്രയധികം അപേക്ഷകർ എത്തിയ സംഭവം, ജോലി തേടുന്നവർ നേരിടുന്ന സമ്മർദത്തെക്കുറിച്ചുള്ള ചർച്ചകൾക്ക് വീണ്ടും വഴിയൊരുക്കിയിരിക്കുകയാണ്.
Comments