ന്യൂഡൽഹി: കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദീപകെ ഒക്ടോബർ 16 വൈകുന്നേരം 5 മണിക്ക് ഡൽഹിയിലെ കണാട്ട് പ്ലേസ് സെൻട്രൽ പാർക്കിൽ 'ലഹ്‌രാ ദോ തിരംഗ' പരിപാടി പ്രഖ്യാപിച്ചു. സിജെപി നേതാക്കളായ സൗരവ് ദാസിനെയും അശുതോഷ് റാങ്കയെയും ദേശീയ പതാക വീശിയതിന്റെ പേരിൽ മാത്രമാണ് ജയിലിലടച്ചതെന്ന് ആരോപിച്ച അദ്ദേഹം, രാജ്യസ്നേഹികളും ദേശീയ പതാകയെ സ്നേഹിക്കുന്നവരും പതാകയുമായി ഈ പരിപാടിയിൽ പങ്കെടുക്കണമെന്ന് അഭ്യർത്ഥിച്ചു.
ഡൽഹിയിലേക്ക് യാത്ര ചെയ്യാൻ കഴിയാത്തവർ അവരവരുടെ നഗരങ്ങളിൽ ദേശീയ പതാകയേന്തി മാർച്ചുകൾ സംഘടിപ്പിക്കണമെന്നും, ദേശീയ പതാക പ്രദർശിപ്പിക്കുന്നത് കുറ്റകരമായി കാണാനാകില്ലെന്നും അദ്ദേഹം വ്യക്തമാക്കി. "ഈ ഏകാധിപതികളോട് പറയുക, നമ്മുടെ ദേശീയ പതാക നമ്മുടെ അഭിമാനമാണ്, അത് വീശുന്നത് കുറ്റമല്ല," അദ്ദേഹം പറഞ്ഞു. താൻ സ്വയം അറസ്റ്റ് വരിക്കാൻ തയ്യാറാണെങ്കിലും ദേശീയ പതാക ഉയർത്താനുള്ള തന്റെ തീരുമാനത്തിൽ നിന്ന് പിന്നോട്ടില്ലെന്നും ദീപകെ കൂട്ടിച്ചേർത്തു.
ദേശീയ പതാകയുമായി സെൻട്രൽ പാർക്കിൽ ഒത്തുകൂടാനും പരിപാടിയിൽ പങ്കെടുക്കാനും അദ്ദേഹം പിന്തുണയ്ക്കാരോട് ആവശ്യപ്പെട്ടു. ഡൽഹിയിലെ പരിപാടിയിൽ പങ്കെടുക്കാൻ കഴിയാത്തവർ രാജ്യത്തിന്റെ മറ്റ് ഭാഗങ്ങളിൽ സമാനമായ മാർച്ചുകൾ പ്രാദേശികമായി സംഘടിപ്പിക്കണമെന്നും അദ്ദേഹം അഭ്യർത്ഥിച്ചു.
പ്രതിഷേധ നിരോധിത മേഖലയായി പ്രഖ്യാപിച്ച ജന്തർ മന്തറിൽ കടന്നുകയറി പ്രതിഷേധിച്ചതിന് സിജെപി അംഗങ്ങളെ കസ്റ്റഡിയിലെടുത്തതിനെ തുടർന്നുണ്ടായ സംഘർഷാവസ്ഥയ്ക്കിടയിലാണ് പ്രതിഷേധ പ്രഖ്യാപനം വന്നിരിക്കുന്നത്. അറസ്റ്റിലായ സിജെപി നേതാക്കളായ സൗരവ് ദാസിനെയും അശുതോഷ് റാങ്കയെയും ഡൽഹി കോടതി അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിട്ടു. രണ്ടുപേരെയും തിഹാർ ജയിലാണ് പാർപ്പിച്ചിരിക്കുന്നത്.
Comments