ഗ്വാട്ടിമാലയിലെ ഒരു ഗ്രാമത്തിൽ, മരിച്ചുവെന്ന് വിശ്വസിച്ച് മണിക്കൂറുകൾക്ക് ശേഷം ശവപ്പെട്ടിയിൽ കിടത്തിയിരുന്ന 15 കാരിയായ പെൺകുട്ടി വിലാപയാത്രയ്ക്കിടെ അനങ്ങുന്നതായി കണ്ടത് കുടുംബത്തെ ഞെട്ടിച്ചു! ബന്ധുക്കളും സുഹൃത്തുക്കളും യാത്രാമൊഴി ചൊല്ലാൻ ഒത്തുകൂടിയപ്പോഴാണ് യൂലീഡി ഇക്സൊടോയാക് എന്ന കൗമാരക്കാരി ബോധം വീണ്ടെടുത്തത്. ഈ സംഭവം തീരാദുഃഖത്തെ ഒരേസമയം ഞെട്ടലിലേക്കും ആശ്വാസത്തിലേക്കും വഴിമാറ്റി.
ഈ സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുകയും വ്യാപക ശ്രദ്ധ നേടുകയും ചെയ്തു. ഔദ്യോഗികമായി ഡോക്ടർമാരുടെ പരിശോധനയില്ലാതെ പെൺകുട്ടി മരിച്ചതായി എങ്ങനെ തീരുമാനിച്ചു എന്നതിനെക്കുറിച്ചുള്ള ചോദ്യങ്ങളും ശക്തമായിട്ടുണ്ട്.
'ന്യൂയോർക്ക് പോസ്റ്റ്' റിപ്പോർട്ട് അനുസരിച്ച്, ഗ്വാട്ടിമാലയിലെ എൽ ജോക്കോട്ട് എന്ന ഗ്രാമത്തിലാണ് സംഭവം നടന്നത്. പെട്ടെന്ന് കുഴഞ്ഞുവീണതിനെ തുടർന്ന് യൂലീഡിയുടെ കുടുംബം വീട്ടിൽ സംസ്കാര ചടങ്ങുകൾക്കായി ഒരുക്കങ്ങൾ നടത്തിവരികയായിരുന്നു. ഉച്ചകഴിഞ്ഞ് 2:30 ഓടെ മരംകൊണ്ടുള്ള ശവപ്പെട്ടിക്ക് ചുറ്റും ആളുകൾ ഒത്തുകൂടിയിരുന്നു. ഇതിനിടയിൽ ശവപ്പെട്ടിയിലേക്ക് നോക്കിയ അമ്മ ലെസ്വിയ റിയോസ് അസാധാരണമായി എന്തോ കണ്ടു. തന്റെ മകൾ മരിച്ചിട്ടില്ലെന്നും അവൾ ജീവനോടെയുണ്ടെന്നും അമ്മ ഉറപ്പിച്ചു പറഞ്ഞു. തുടർന്ന് കുടുംബാംഗങ്ങൾ കൂടുതൽ അടുത്തേക്ക് പോയി നോക്കുകയായിരുന്നു.
തുടർന്ന് ശവപ്പെട്ടിയുടെ ഗ്ലാസ് തുറന്നപ്പോൾ കൗമാരക്കാരി അനങ്ങുന്നത് അവർ കണ്ടു. നിമിഷങ്ങൾക്കകം അവൾ പെട്ടെന്ന് എഴുന്നേറ്റിരിക്കുകയും അവിടെയുണ്ടായിരുന്നവരെ അത്ഭുതപ്പെടുത്തുകയും ചെയ്തു. പിങ്ക് ടി-ഷർട്ട് ധരിച്ചിരുന്ന യൂലീഡി ബോധം വീണ്ടെടുക്കുന്നതും ബന്ധുക്കൾ ചുറ്റുംകൂടുന്നതും ദൃശ്യങ്ങളിൽ കാണാം. തുടർന്ന് കുടുംബാംഗങ്ങൾ അവളെ ശവപ്പെട്ടിയിൽ നിന്ന് പുറത്തെടുക്കുകയും കുടിക്കാൻ വെള്ളം നൽകുകയും ചെയ്തു. ആ ഞെട്ടൽ പെട്ടെന്നുതന്നെ ആശ്വാസത്തിന് വഴിമാറി, ബന്ധുക്കൾ ആഹ്ലാദത്തോടെ "ഹല്ലേലൂയാ" എന്ന് വിളിച്ചുപറയുന്നത് കേൾക്കാമായിരുന്നു.
പിതാവ് എബ്രഹാം ഇക്സൊടോയാക് യൂലീഡിയെയും കൊണ്ട് കാറിൽ മെഡിക്കൽ സെന്ററിലേക്ക് പോകുന്നതിനിടയിലാണ് അവൾ കുഴഞ്ഞുവീണത്. സുവിശേഷ പ്രസംഗകനായ എബ്രഹാം വണ്ടി നിർത്തി മകളുടെ നില പരിശോധിച്ചു. ശ്വാസമെടുക്കുന്നില്ലെന്നും കൈത്തണ്ടയിൽ നാഡിമിടിപ്പ് അനുഭവപ്പെടുന്നില്ലെന്നും കണ്ടപ്പോൾ അവൾ മരിച്ചുവെന്ന് അദ്ദേഹം വിശ്വസിച്ചു.
പെൺകുട്ടി കുഴഞ്ഞുവീണ് മണിക്കൂറുകൾക്കകം തന്നെ കുടുംബം സംസ്കാര ചടങ്ങുകൾക്കുള്ള തയ്യാറെടുപ്പുകൾ നടത്തിയതായി റിപ്പോർട്ടുകൾ വ്യക്തമാക്കുന്നു. ഒരു ഡോക്ടറുടെ പരിശോധനയോ ഔദ്യോഗിക മരണ സർട്ടിഫിക്കറ്റോ ഇല്ലാതെ ശവപ്പെട്ടി വാങ്ങുകയും വിലാപയാത്ര ഏർപ്പാടാക്കുകയും ചെയ്തത് വലിയ വിമർശനത്തിനു കാരണമായിരിക്കുകയാണ്.
Comments