ബോളിവുഡില്‍ ഏറെ ആരാധകരുള്ള താരദമ്പതികളാണ് സെയ്ഫ് അലി ഖാനും കരീന കപൂറും. വര്‍ഷങ്ങള്‍ നീണ്ട പ്രണയത്തിനൊടുവിലായിരുന്നു ഇവരുടെ വിവാഹം. ഇപ്പോഴിതാ 14-ാം വിവാഹവാര്‍ഷികം ആഘോഷിക്കുകയാണ് ഇരുവരും. വിവാഹവാര്‍ഷികദിനത്തില്‍ സെയ്ഫിന് ആശംസകള്‍ നേര്‍ന്ന് കരീന പങ്കുവെച്ച കുറിപ്പും ചിത്രങ്ങളുമാണ് ശ്രദ്ധേയമാകുന്നത്.
തങ്ങള്‍ക്ക് ഇനിയും ഒരുപാട് കാലം മുന്നിലുണ്ട് എന്ന് സമൂഹമാധ്യമങ്ങളില്‍ കുറിച്ചുകൊണ്ടാണ് താരം സ്‌നേഹം പങ്കുവെച്ചത്. പ്രണയകാലത്തെ ഓര്‍മകള്‍, കുടുംബനിമിഷങ്ങള്‍, അവധിക്കാലയാത്രകള്‍, മക്കള്‍ക്കൊപ്പമുള്ള ചിത്രങ്ങള്‍ എന്നിവയെല്ലാം താരം ആശംസാക്കുറിപ്പിനൊപ്പം പങ്കുവെച്ചിട്ടുണ്ട്. "സൂര്യന് ചുറ്റും മറ്റൊരു വര്‍ഷം കൂടി... ഇനിയും ഒരുപാട് ദൂരം മുന്നിലുണ്ട്" എന്നാണ് ചിത്രങ്ങള്‍ക്ക് കരീന ക്യാപ്ഷന്‍ നല്‍കിയിരിക്കുന്നത്.
കരീനയ്ക്ക് ആശംസകള്‍ നേര്‍ന്ന് സെയ്ഫും ഇന്‍സ്റ്റഗ്രാമില്‍ പോസ്റ്റ് പങ്കുവെച്ചിട്ടുണ്ട്. ‘അങ്ങനെ നമ്മുടെ കാര്യങ്ങള്‍ ഒക്കെ ശരിയായി. വിവാഹവാര്‍ഷിക ആശംസകള്‍ പ്രിയേ’ എന്നായിരുന്നു കരീനയ്ക്കും മക്കള്‍ക്കുമൊപ്പമുളള മനോഹരമായ നിമിഷങ്ങള്‍ പങ്കുവെച്ചുകൊണ്ട് സെയ്ഫ് കുറിച്ചത്.
2008-ല്‍ വിജയ് കൃഷ്ണ ആചാര്യ സംവിധാനം ചെയ്ത 'തഷാന്‍' എന്ന ചിത്രത്തിന്റെ സെറ്റില്‍ വെച്ചാണ് കരീനയും സെയ്ഫും കണ്ടുമുട്ടുന്നത്. നീണ്ട വര്‍ഷത്തെ പ്രണയത്തിനൊടുവില്‍ 2012 ഒക്ടോബര്‍ 16-നായിരുന്നു ഇരുവരും വിവാഹിതരായത്. തൈമൂര്‍, ജെഹ് എന്നിങ്ങനെ രണ്ടാണ്‍മക്കളാണ് ഈ ദമ്പതികള്‍ക്കുള്ളത്.
അതേസമയം മേഘ്‌ന ഗുല്‍സാറിന്റെ സംവിധാനത്തില്‍ ഒരുങ്ങിയ 'ദായ്‌റ'യാണ് കരീനയുടെ ഏറ്റവും പുതിയ ചിത്രം. മലയാളി താരം പൃഥ്വിരാജും ചിത്രത്തില്‍ പ്രധാനവേഷത്തില്‍ എത്തിയിരുന്നു. പ്രിയദര്‍ശന്‍ സംവിധാനം ചെയ്ത 'ഹൈവാന്‍' ആയിരുന്നു സെയ്ഫിന്റേതായി ഏറ്റവും ഒടുവില്‍ പുറത്തിറങ്ങിയ ചിത്രം.
Comments