ലക്‌നൗവില്‍ വീട്ടിനുള്ളില്‍ ഒളിച്ചിരുന്ന ഭീകരനെ വധിച്ചു; ഏറ്റുമുട്ടല്‍ അവസാനിച്ചു

ലക്‌നൗ: 12 മണിക്കൂര്‍ നീണ്ട ഏറ്റുമുട്ടലിന് ശേഷം ലക്‌നൗവിലെ താക്കൂര്‍ഗഞ്ചില്‍ ഒളിച്ചിരുന്ന ഭീകരനെ കൊന്നു. ഇന്നലെ ആരംഭിച്ച ഏറ്റുമുട്ടല്‍ രാത്രി ഏറെ വൈകിയും തുടരുകയായിരുന്നു. ആദ്യം രണ്ട് ഭീകരര്‍ ഇവിടെ ഒളിച്ചിരിക്കുന്നുണ്ടെന്ന തരത്തില്‍ റിപ്പോര്‍ട്ടുകള്‍ വന്നിരുന്നു. പിന്നീട് നടത്തിയ തിരച്ചിലില്‍ ഒരാളുടെ മൃതദേഹം കണ്ടെത്തുകയായിരുന്നു. ഇയാളുടെ പക്കല്‍ നിന്നും ആയുധങ്ങളും കണ്ടെത്തിയിട്ടുണ്ട്. ഒരു പിസ്റ്റല്‍, കത്തി, റിവോള്‍വര്‍ എന്നിവയാണ് കണ്ടെത്തിയിരിക്കുന്നത്.

ഐഎസ്‌ഐഎസ് ബന്ധമുള്ള ഭീകരന്‍ സൈഫുള്ള എന്നയാളാണ് ഏറ്റുമുട്ടലില്‍ കൊല്ലപ്പെട്ടതെന്ന് ഭീകരവിരുദ്ധ സ്‌ക്വാഡ് ഐജി അസീം അരുണ്‍ പറഞ്ഞു. മധ്യപ്രദേശിലെ ഭോപ്പാല്‍ - ഉജ്ജയിന്‍ യാത്രാ തീവണ്ടിയില്‍ സ്‌ഫോടനം നടത്തിയ ആളാണ് കൊല്ലപ്പെട്ട സൈഫുള്ള എന്നും അദ്ദേഹം പറഞ്ഞു. ആക്രമണത്തില്‍ 10 യാത്രക്കാര്‍ക്ക് പരിക്കേറ്റിരുന്നു.

ഭീകരന്‍ ഒളിച്ചിരുന്നു എന്ന കേന്ദ്ര രഹസ്യാന്വേഷണ വിഭാഗത്തിന്റെ മുന്നറിയിപ്പിനെ തുടര്‍ന്ന് കെട്ടിടത്തില്‍ പോലീസ് പരിശോധന നടത്തുന്നതിനിടെ വെടിവയ്പ്പ് നടക്കുകയായിരുന്നു. ഇന്നലെ വൈകിട്ട് നാല് മണിയോടെയാണ് തീവ്രവാദി താക്കൂര്‍ഗഞ്ചിലെ വീട്ടില്‍ രണ്ട് ഭീകരര്‍ ഒളിച്ചിരിക്കുന്നതായി റിപ്പോര്‍ട്ടുകള്‍ വന്നിരിക്കുന്നത്. തുടര്‍ന്ന് അവിടെ എത്തിയ പോലീസിന്റെ നേര്‍ക്ക് ഇയാള്‍ വെടിയുതിര്‍ക്കുകയായിരുന്നു.

ആദ്യഘട്ടത്തില്‍ ഭീകരനെ ജീവനോടെ പിടികൂടുവാന്‍ ശ്രമം നടത്തിയിരുന്നെങ്കിലും അതിന് സാധിച്ചില്ല. അതിനായി കണ്ണീര്‍ വാതക പ്രയോഗവും ജിഞ്ചര്‍ ബോംബാക്രമണം എന്നിവ നടത്തി കീഴടങ്ങുന്നതിന് നിര്‍ദ്ദേശം നല്‍കിയെങ്കിലും ഇയാള്‍ അതിന് തയ്യാറായിരുന്നില്ല.