ന്യൂഡല്ഹി: അപരിചിതമായ നമ്പറുകളിലേക്ക് വിളിച്ച് യുവതികളെ കുരുക്കുന്ന ഏകാന്തപഥികന്മാര് രാജ്യത്ത് വിലസുന്നതായി റിപ്പോര്ട്ട്. കയ്യില് കിട്ടുന്ന നമ്പറുകളിലേക്കെല്ലാം വിളിക്കുകയും എടുക്കുന്നത് യുവതികളാണെങ്കില് അവരുമായി ബന്ധം ഉണ്ടാക്കുകയും ചെയ്യുന്ന 'ഫോണ് റോമിയോ' കളെ കുറിച്ച പരാതി വ്യാപകമായ സാഹചര്യത്തില് ഉത്തര്പ്രദേശ് പോലീസ് ലക്നൗവ്വില് പരാതിക്കാര്ക്കായി കോള് സെന്റര് തുടങ്ങി. ഇന്ത്യയ്ക്ക് പുറമേ ബംഗ്ളാദേശില് നിന്നു വരെ വിളിശല്യം വരുന്നതായി പരാതി ഉയര്ന്നെന്നാണ് അന്താരാഷ്ട്ര മാധ്യമങ്ങളുടെ റിപ്പോര്ട്ട്.
ഒരാളെ കിട്ടിക്കഴിഞ്ഞാല് അവരുമായി പതിയെ ബന്ധം വളര്ത്തിയെടുക്കും. നിങ്ങളുടെ മൊബൈല് റീചാര്ജ്ജ് ചെയ്തു തരട്ടെ എന്നും മറ്റും ചോദിച്ചു തുടങ്ങുന്ന ഇവര് പിന്നീട് നിങ്ങളോട് സംസാരിക്കുമ്പോള് ഞാന് വിറയ്ക്കുന്നു എന്നും നിങ്ങളുമായി സ്വകാര്യത പങ്കുവെയ്ക്കാന് ആഗ്രഹിക്കുന്നു തുടങ്ങിയ രീതിയിലേക്ക് സംസാരം കൊണ്ടുവരും. 680 ദശലക്ഷം മൊബൈല് ഉപയോക്താക്കളുള്ള ഇന്ത്യയില് ദിവസം 500 ലധികം വിളികള് നടത്തുന്ന വിരുതന്മാര് വരെയുണ്ടെന്നാണ് റിപ്പോര്ട്ടുകള്.
പോലീസ് അടുത്തിടെ അറസ്റ്റ് ചെയ്യുമ്പോള് 24 കാരനായ പ്രേംസാഗര് തീവാരിയുടെ കയ്യില് നിന്നും പിടിച്ചെടുത്തത് എട്ടു സിമ്മുകളായിരുന്നു. ദിവസേനെ ഇയാള് 500 യുവതികളെ വിളിച്ചിരുന്നതായിട്ടാണ് കണക്കുകള്. പിടിക്കപ്പെടുമ്പോള് ഇങ്ങിനെ വിളിക്കുമ്പോള് എവിടെ നിന്നെങ്കിലും ആരെങ്കിലും കുരുങ്ങുമെന്നും അപ്പോള് അന്നത്തെ പരിപാടി അവസാനിപ്പിക്കുമെന്നുമാണ് ഇയാള് പോലീസിന് നല്കിയ മൊഴി. സ്ത്രീകളുടെ ഫോണ് നമ്പര് ദുരുപയോഗം ചെയ്യുന്നതായുള്ള പരാതി വ്യാപകമായ സാഹചര്യത്തില് യുപി പോലീസ് ലക്നൗവ്വില് തുടങ്ങിയ കോള് സെന്ററില് ദിവസം വരുന്നത് 700 ലധികം പരാതികളാണ്.
ഉത്തര്പ്രദേശില് കാണാന് കൊള്ളാവുന്ന പെണ്ണുങ്ങളുടെ ഫോണ് നമ്പറുകള് വില്പ്പന നടത്തുന്ന മാഫിയകള് വരെ ഉള്ളതായി നേരത്തേ റിപ്പോര്ട്ട് വന്നിരുന്നു. സൗന്ദര്യം അനുസരിച്ച് 500 മുതല് ഫീസ് ഈടാക്കുന്ന ഇവര് ഫോണ് നമ്പറുകള് ആവശ്യക്കാര്ക്ക് വിലയ്ക്ക് നല്കും. സാധാരണ പെണ്കുട്ടികള്ക്ക് വരെ ഇവര് 50 രൂപ ഈടാക്കിയിരുന്നത്്. ഫ്ളെക്സി റീ ചാര്ജ്ജിനെത്തുന്ന നമ്പറുകളാണ് ഇങ്ങിനെ ഉപയോഗിക്കുന്നത്. തന്റെ സലൂണിന്റെ ഫേസ്ബുക്ക് പേജില് നമ്പര് പോസ്റ്റ് ചെയ്തതിനെ തുടര്ന്ന് ഒരു 24 കാരിയായ മേക്കപ്പ് കലാകാരിക്ക് ഒടുവില് 200 നമ്പറുകള് ബ്ളോക്ക് ചെയ്യേണ്ടി വന്നു.
