തിരുവനന്തപുരം: തൃശൂര് പാമ്പാടി നെഹ്റു കോളജില് ദുരൂഹ സാഹചര്യത്തില് മരിച്ച ജിഷ്ണു പ്രണോയുടെ മാതാപിതാക്കള്ക്കു നേരെ പോലീസിന്റെ ക്രൂരത. പ്രതികളെ അറസ്റ്റു ചെയ്യാന് കഴിയാത്ത പോലീസ് നടപടിയില് പോലീസ് ആസ്ഥാനത്ത് പ്രതിഷേധിക്കാനെത്തിയ മതാതാപിതാക്കളെ പോലീസ് റോഡിലൂടെ വലിച്ചിഴച്ചുകൊണ്ടുപോയി. അറസ്റ്റു ചെയ്തു മ്യൂസിയം പോലീസ് സ്റ്റേഷനില് എത്തിച്ചു. പിന്നീട് പൂജപ്പുര സ്റ്റേഷനിലേക്ക് കൊണ്ടുപോയി. തിരുവനന്തപുരത്ത് പ്രതിഷേധ സമരം നടത്തില്ലെന്ന ഉറപ്പ് ഇവരില് നിന്ന് വാങ്ങാനാണ് പോലീസിന്റെ ശ്രമം.
പോലീസിന്റെ പിടിവലിക്കിടെ റോഡില് വീണ ജിഷ്ണുവിന്റെ അമ്മയെ പോലീസ് ചവിട്ടിയെന്നും അവര്ക്ക് പരുക്കേറ്റതായും റിപ്പോര്ട്ടുണ്ട്. അവശനിലയിലായ ഇവരെ പേരൂര്ക്കട ആശുപത്രിയിലേക്ക് മാറ്റി. കൈക്കും തലയ്ക്കും പരുക്കേറ്റ നിലയിലാണ്. രക്തസമ്മര്ദ്ദം വളരെ താഴ്ന്ന നിലയിലാണ്. വിശദമായ പരിശോധനയ്ക്ക് ശേഷം ആവശ്യമെങ്കില് മെഡിക്കല് കോളജിലേക്ക് മാറ്റുമെന്ന് ഡോക്ടര്മാര് അറിയിച്ചു.
രാവിലെ പത്തു മണിക്കു ശേഷമാണ് ജിഷ്ണുവിന്റെ മാതാപിതാക്കളും ബന്ധുക്കളും പോലീസ് ആസ്ഥാനത്ത് പ്രതിഷേധിക്കാനെത്തിയത്. എന്നാല് പോലീസ് ആസ്ഥാനത്തെ പ്രതിഷേധം അനുവദിക്കില്ലെന്ന് പോലീസ് അറിയിച്ചു. ഇത് മറികടന്ന് സമരം ചെയ്യാന് ശ്രമിച്ചതോടെ ഡി.ജി.പി ആസ്ഥാനത്ത് നാടകീയ രംഗങ്ങളാണ് അരങ്ങേറിയത്. തുടര്ന്ന് ജിഷ്ണുവിന്റെ അമ്മ മഹിജയെ പോലീസ് ബലം പ്രയോഗിച്ച് നീക്കാന് ശ്രമിച്ചു. റോഡില് ഇരുന്നു പ്രതിഷേധിച്ച അമ്മയെ പോലീസ് റോഡിലൂടെ വലിച്ചിഴച്ചു. തുടര്ന്ന് പോലീസ് വാനിലേക്ക് കയറ്റി അറസ്റ്റു രേഖപ്പെടുത്തുകയായിരുന്നു.
രാവിലെ റെയില്വേ സ്റ്റേഷനില് എത്തിയപ്പോള് മുതല് ഇവരെ സമരത്തില് നിന്ന് പിന്തിരിപ്പിക്കാന് പോലീസ് ശ്രമം നടത്തിയിരുന്നു. ഇത് വകവകയ്ക്കാതെ വഴുതക്കാടുള്ള ഹിന്ദി പ്രചാരക സഭയുടെ സമീപത്തുനിന്നാണ് ഡി.ജി.പി ആസ്ഥാനത്തേക്ക് ഇവര് സമരം ചെയ്തത്. അഞ്ചു പേരുമായി ചര്ച്ചയ്ക്ക തയ്യാറാണെന്ന് ഡി.ജി.പി അറിയിച്ചുവെങ്കിലും ജിഷ്ണുവുമായി രക്തബന്ധമുള്ള 14 പേര് സമരത്തിലുണ്ടെന്നും അവരുമായെല്ലാം ഡി.ജി.പി ചര്ച്ചയ്ക്ക് തയ്യാറാകണമെന്നായിരുന്നു സമരക്കാരുടെ ആവശ്യം.
മുന്കൂര് ജാമ്യമില്ലാത്ത പ്രതികളായ ശക്തിവേല്, പ്രവീണ് എന്നിവരെ പോലും അറസ്റ്റുചെയ്യാന് പോലീസ് തയ്യാറാകുന്നില്ല. പ്രതികളുടെ സ്വത്ത് കണ്ടുകെട്ടുമെന്ന് ഡി.ജി.പി ലോക്നാഥ് ബെഹ്റ ഉറപ്പുനല്കിയിരുന്നു. അതുപോലും പാലിക്കാന് പോലീസ് തയ്യാറാകുന്നില്ല. തങ്ങളെ പ്രതിരോധിക്കാന് കാണിക്കുന്ന ആവേശത്തിന്റെ കുറച്ചെങ്കിലും ഒളിവിലായിരിക്കുന്ന പ്രതികളെ പിടികൂടാന് പോലീസ് കാണിക്കണമെന്നാണ് സമരത്തിന് ഐക്യദാര്ഡ്യവുമായി എത്തിയവര് പറയുന്നത്.
