ന്യൂഡല്ഹി: എഴുത്തുകാരന് ചേതന് ഭഗത്തിന്റെ വണ് ഇന്ത്യന് ഗേള് മോഷണമാണെന്ന് ആരോപിച്ച് എഴുത്തുകാരി രംഗത്തെത്തി. ചേതന് ഭഗതിന്റെ വണ് ഇന്ഡ്യന് ഗേള് തന്റെ പുസ്തകത്തില് നിന്ന് കോപ്പിയടിച്ചതാണെന്ന ആരോപണമുയര്ത്തി നിയമ നടപടിക്കൊരുങ്ങുകയാണ് അന്വിത ബാജ്പേയി എന്ന എഴുത്തുകാരി. ഇതേ തുടര്ന്ന് പുസ്തകത്തിന്റെ വില്പ്പന നിര്ത്തിവെയ്ക്കുകയും ചെയ്തു. പുസ്തകത്തിന്റെ വില്പ്പന നിര്ത്തിവെയ്ക്കണമെന്ന് ബംഗളൂരു കോടതിയാണ് താല്ക്കാലിക ഉത്തരവ് പുറപ്പെടുവിച്ചിരിക്കുന്നത്.
തന്റെ പുസ്തകമായ ലൈഫ്-ഓഡ്സ്, ആന്ഡ് എന്ഡ്സ് എന്ന പുസ്തകത്തില് നിന്നുമുള്ള ഡ്രോയിങ് പാരലല്സ് എന്ന കഥയുടെ മോഷണമാണ് ചേതന് ഭഗതിന്റെ കൃതി എന്നാണ് ആരോപണം. കഥാപാത്രങ്ങള്, സ്ഥലങ്ങള്, വൈകാരിക മുഹൂര്ത്തങ്ങള് എന്നിവ കോപ്പിയിടിച്ചിട്ടുണ്ടെന്നും അന്വിത ആരോപിക്കുന്നു.
