പുനലൂര്/കാലടി: വനംമന്ത്രി കെ. രാജുവിന്റെ മണ്ഡലത്തില് ഇര തേടിയിറങ്ങിയ പുലി സംരക്ഷണവേലിയില് കുടുങ്ങി ചോരവാര്ന്നു ചത്തു. പുലി കുടുങ്ങിയതു നാട്ടുകാര് ശ്രദ്ധയില്പെടുത്തിയിട്ടും വനംവകുപ്പ് അധികൃതര് സ്ഥലത്തെത്തിയതു മണിക്കൂറുകള്ക്കുശേഷം. അപ്പോഴേക്കു സംരക്ഷണവേലിയിലെ കമ്പികള് ദേഹത്തു തുളച്ചുകയറി പുലി ചത്തു.
വനംമന്ത്രിയുടെ നിയോജകമണ്ഡലത്തില് നടന്ന സംഭവം വിവാദത്തില്. അഞ്ചുവയസുള്ള ആണ്പുലിയാണു ചത്തത്. തെന്മല വനം ഡിവിഷനിലെ ആര്യങ്കാവ് റേഞ്ച്, ഇടപ്പാളയം സെക്ഷന് പരിധിയില് ഇന്നലെ രാവിലെയാണു സംഭവം. ഇടപ്പാളയം ഷെമീറിന്റെ എസ്റ്റേറ്റില് വന്യമൃഗങ്ങള് കടക്കാതിരിക്കാന് നിര്മിച്ച ഇരുമ്പുവേലിയില് കുടുങ്ങിയ പുലിയെ രാവിലെ 5.30-നു ടാപ്പിങ് തൊഴിലാളിയാണു കണ്ടത്. നാട്ടുകാര് ഉടന് സെക്ഷന് ഫോറസ്റ്റര് ഉള്പ്പെടെ വനപാലകരെ വിവരമറിയിച്ചു.
എന്നാല് മണിക്കൂറുകള് െവെകി രാവിലെ എട്ടോടെയാണ് ഉദ്യോഗസ്ഥരെത്തിയത്. അപ്പോഴേക്കു കമ്പി തുളഞ്ഞുകയറി, ചോരവാര്ന്ന് പുലി ചത്തിരുന്നു. തെന്മല ഡി.എഫ്.ഒ: പി. മീനാക്ഷി, ആര്യങ്കാവ് റേഞ്ച് ഓഫീസര് ജിയാസുദിന് ലബ, ഇടപ്പാളയം സെക്ഷന് ഫോറസ്റ്റര് പ്രസാദ് എന്നിവര് സ്ഥലത്തെത്തി മേല്നടപടി സ്വീകരിച്ചു. കോന്നിയില്നിന്ന് എത്തിയ വനംവകുപ്പ് വെറ്ററിനറി ഡോക്ടര് ജയകുമാര് ഇന്ക്വസ്റ്റ് നടത്തി. കൂടുതല് പരിശോധനകള്ക്കായി പുലിയുടെ ജഡം പാലോട് വെറ്ററിനറി ആശുപത്രിയിലെത്തിച്ചു.
കാലടി (കൊച്ചി): നാടിനെ വിറപ്പിച്ച പുലി ഒടുവില് വനംവകുപ്പിന്റെ കെണിയില് കുടുങ്ങി. ഇല്ലിത്തോട് ഒന്നാം ബ്ലോക്കില് ദര്ശന ജങ്ഷനു സമീപം പെരത്തേന് ശശികുമാറിന്റെ പറമ്പില് വനംവകുപ്പ് സ്ഥാപിച്ച കൂട്ടിലാണു ശനിയാഴ്ച രാത്രി പുലി കുടുങ്ങിയത്. പുലിയെ പിടികൂടാന് സ്ഥാപിച്ച കൂട്ടില് കെട്ടിയിട്ടിരുന്ന പട്ടിയുടെ കരച്ചിലും ബഹളവും രാത്രിതന്നെ കേട്ടെങ്കിലും ആരും പോയി നോക്കിയില്ല. ഇന്നലെ രാവിലെയാണു പുലി കൂട്ടില് അകപ്പെട്ടതായി കണ്ടത്.
വിവരമറിഞ്ഞു ഡെപ്യൂട്ടി റേഞ്ചര് കൃഷ്ണദാസിന്റെ നേതൃത്വത്തില് വനപാലകര് സ്ഥലത്തെത്തി പുലിയെ കൂടോടെ കോടനാട് റെസ്ക്യൂ ഹോമിലേക്കു കൊണ്ടുപോയി. പുലിയുടെ പ്രായം പരിശോധനകള്ക്കുശേഷമേ പറയാനാകൂവെന്നും മേലധികാരികളുടെ നിര്ദേശപ്രകാരം വനത്തില് തുറന്നുവിടുമെന്നും അധികൃതര് അറിയിച്ചു.
കഴിഞ്ഞ ഞായറാഴ്ച രാത്രി ശശികുമാറിന്റെ വീട്ടുമുറ്റത്തെ കൂട്ടില്നിന്ന് ആടിനെ അജ്ഞാതജീവി പിടിച്ചുതിന്നിരുന്നു. മുറ്റത്തെ കാല്പാടുകളില്നിന്ന് 'കൊലയാളി' പുലിയാണെന്ന നിഗമനത്തിലെത്തി. പ്രദേശത്തെ തെരുവുനായ്ക്കളുടെ എണ്ണത്തിലും വന്കുറവനുഭവപ്പെട്ടിരുന്നു. ഇതേത്തുടര്ന്നാണു കഴിഞ്ഞദിവസം കൂട് സ്ഥാപിച്ചത്.
