മുംബൈ: പാടിയ 21 പാട്ടുകളില് നാലെണ്ണം മാത്രം പാടുകയും ബാക്കിക്ക് ചുണ്ടുകള് അനക്കി ആരാധകരെ പറ്റിക്കുകയും ചെയ്തെന്നെ വിമര്ശനം ശക്തമായതോടെ വിഖ്യാത പോപ്പ് ഗായകന് ജസ്റ്റിന് ബീബര് ആരുമറിയാതെ മുംബൈയില് നിന്നും മുങ്ങി. താജ്മഹല് ഉള്പ്പെടെയുള്ള ഇന്ത്യയിലെ ലോകപ്രസിദ്ധ കാഴ്ചകളെയും വര്ണ്ണശബളമായ ജെയ്പൂരിനെയും എല്ലാം അവഗണിച്ച് പരിപാടി നടന്ന് മണിക്കൂറുകള്ക്കകം യുവഗായകന് ബഹളമില്ലാതെ സ്ഥലം വിട്ടു.
ബുധനാഴ്ച ഡിവൈ പാട്ടീല് സ്റ്റേഡിയത്തില് നടന്ന സംഗീത നിശയ്ക്കെതിരേ വന് വിമര്ശനമാണ് സാമൂഹിക മാധ്യമങ്ങളില് ഉയര്ന്നത്. ഇതേ തുടര്ന്നാണ് താരം രായ്ക്കു രാമാനം ഇന്ത്യ വിട്ടതെന്നാണ് വിവരം. അഞ്ചു ദിന സന്ദര്ശനമായിരുന്നു താരം പദ്ധതി ഇട്ടിരുന്നത്. സംഗീത പരിപാടിക്ക് വേണ്ടി തിങ്കളാഴ്ച രാവിലെ ഇന്ത്യയില് എത്തുന്ന ബീബര് രണ്ടു ദിവസം മുംബൈയില് ചുറ്റിക്കറങ്ങുമെന്നും ചില ബോളിവുഡ് താരങ്ങള് പങ്കെുടുക്കുന്ന വിരുന്നില് പങ്കെടുക്കുമെന്നുമായരുന്നു വിവരം. ബുധനാഴ്ച പരിപാടിക്ക് ശേഷം ജെയ്പൂരും ആഗ്രയും സന്ദര്ശിക്കാനുമായിരുന്നു പരിപാടി. എന്നാല് ബീബര് എത്തിയത് തന്നെ ബുധനാഴ്ച രാവിലെയായിരുന്നു.
രാത്രിയിലെ പരിപാടി കഴിഞ്ഞ് മണിക്കൂറുകള്ക്കകം വ്യാഴാഴ്ച അതിരാവിലെ കാറില് രഹസ്യമായി വിമാനത്താവളത്തിലെത്തി ബീബര് മടങ്ങി. അര്ദ്ധനഗ്നനായി എത്തിയ ബീബര് കാറില് നിന്നും പുറത്തിറങ്ങുന്ന ദൃശ്യങ്ങള് സാമൂഹ്യമാധ്യമങ്ങളിലൂടെ പ്രചരിക്കുന്നുണ്ട്. കാറില് നിന്നും ഇറങ്ങിയ ശേഷമാണ് താരം ടീ ഷര്ട്ട് ഇട്ടത്. അതേസമയം ഇന്ത്യയിലെ ചൂട് സഹിക്കാന് കഴിയാതെയാണ് താരം ഇന്ത്യ വിട്ടതെന്നാണ് പ്രചരണം. താരത്തിന്റെ അടുത്ത സംഗീത പരിപാടി നാളെ ദക്ഷിണാഫ്രിക്കയിലെ ജോഹന്നാസ് ബര്ഗിലും 17 ന് കേപ് ടൗണിലുമാണ്.
