ന്യൂഡല്ഹി: ഏകദേശം 93 ലക്ഷം രൂപ വില മതിക്കുന്ന മൂന്നര കിലോ സ്വര്ണ്ണ ബാറുകള് അരയില് കെട്ടി ഷോര്ട്സിനുള്ളില് ഒളിപ്പിച്ച് കടത്താന് ശ്രമിച്ചതിന് വീല് ചെയറില് സഞ്ചരിക്കുന്ന 62 കാരന് പിടിയിലായി. ഇന്ദിരാഗാന്ധി വിമാനത്താവളത്തില് ഞായറാഴ്ചയാണ് ഇയാളെ അറസ്റ്റ് ചെയ്തത്. ഇയാള് വന്ന അതേ വിമാനത്തില് സഹായിയെന്ന് പറഞ്ഞ് കൂടെ കൂടിയ മറ്റൊരാളും പിടിയിലായിട്ടുണ്ട്.
പുതുച്ചേരി സ്വദേശിയാണ് പിടിയിലായത്. ദുബായ് വിമാനത്താവളത്തില് നിന്നും എത്തിയ ഇയാള് ആദ്യം വീല് ചെയര് ആവശ്യപ്പെട്ടു. എന്നാല് ഇയാള് ഗ്രീന് ചാനല് മറികടക്കാന് ശ്രമിക്കുന്നതിനിടയില് പരിശോധനയ്ക്കായി ഇയാളെ തടഞ്ഞു നിര്ത്തുകയും സ്വര്ണ്ണക്കട്ടി ശരീരത്തില് നിന്നും കണ്ടെത്തുകയായിരുന്നു.
അരയ്ക്ക് ചുറ്റും സ്വര്ണ്ണക്കട്ടി വെച്ചുകെട്ടി അവ ഇലാസ്റ്റിക് കൊണ്ട് വരിഞ്ഞു മുറുക്കി അതിന് മുകളില് ഷോര്ട്സ് ഇട്ട നിലയിലായിരുന്നു. 92.87 ലക്ഷം രൂപ മുല്യം വരുന്ന സ്വര്ണ്ണബാറുകളാണ് കണ്ടെത്തിയത്. സഹായിയായി എത്തുകയും വൃദ്ധന്റെ ബാഗുകളും മറ്റും പിന്നീട് വാങ്ങാനെന്നും പറഞ്ഞ് കൂടിയ കൂട്ടാളിയാണ് അറസ്റ്റിലായ രണ്ടാമന്.
