വികലാംഗന്റെ സൈക്കിള് മോഷ്ടിച്ചതിന് പിടിക്കപ്പെട്ട പയ്യന്റെ തിരുനെറ്റിയില് 'ഞാന് കള്ളനും കൊള്ളരുതാത്തവനും' എന്ന് പച്ചകുത്തി. ബ്രസീലില് നടന്ന സംഭവത്തില് പ്രമുഖ പച്ചകുത്ത് ആര്ടിസ്റ്റ് മെയ്ക്കണ് വെസ്ളി എന്നയാള്ക്ക് എതിരേയാണ് ആരോപണം. രണ്ടു ദിവസമായി കുട്ടിയെ കാണാതെ കൂടി വന്ന സ്ഥിതിയില് പച്ചകുത്തുകാരനും സഹായിക്കുമെതിരേ വീട്ടുകാര് കേസ് കൊടുത്തു.
ഒരു കാല് മാത്രമുള്ള വികലാംഗന്റെ സൈക്കിള് മോഷ്ടിച്ച പയ്യനെ വെസ്ളിയും സഹായിയും ഓടിച്ചിട്ടു പിടിച്ചശേഷം പിടിച്ചുകെട്ടി പച്ച കുത്തുകയായിരുന്നു. 'ഞാന് കള്ളനാണ്, ഗുണമില്ലാത്തവനാണ്' എന്നത് പോര്ച്ചുഗീസ് ഭാഷയില് എഴുതി. ഈ രംഗമെല്ലാം മൊബൈലില് ചിത്രീകരിക്കാനും മറന്നില്ല. വെള്ളിയാഴ്ച നടന്ന സംഭവത്തില് പേടിച്ചുപോയ പയ്യനെ രണ്ടു ദിവസമായി കാണാനില്ലെന്നാണ് പരാതി.
ഓണ്ലൈനില് വീഡിയോ പ്രചരിച്ചതിനെ തുടര്ന്ന വീട്ടുകാര് കാണുകയും പോലീസില് ആര്ട്ടിസ്റ്റിനും സഹായി റോനില്ഡോ മൊറെയ്റ ഡി അരൗജോയ്ക്കും എതിരേ പരാതി നല്കുകയുമായിരുന്നു. ഇവരുടെ ശബ്ദവും വീഡിയോയില് കേള്ക്കാനാകുന്നുണ്ട്. എന്നാല് ഇരുവരും പറയുന്നത് സംഭവം കഴിഞ്ഞ് പയ്യനെ തങ്ങള് വിട്ടയച്ചെന്നാണ്. എന്നാല് ഇതുവരെ കണ്ടെത്താന് കഴിഞ്ഞിട്ടില്ല.
