ആലപ്പുഴ: പ്രായത്തിന്റെ അവശതകള് അലട്ടുമ്പോഴും ഉള്ളിലെ തീക്കനല് കെടാതെ കെ.ആര്. ഗൗരിയമ്മ നൂറാം വയസിലേക്ക്. കമ്മ്യൂണിസ്റ്റ് പ്രസ്ഥാനത്തിന്റെ മുന്നണിപ്പോരാളിയും ജെ.എസ്.എസ്. നേതാവുമായ കെ.ആര്. ഗൗരിയമ്മയ്ക്കു നാളെ 99-ാം പിറന്നാള്. പിറന്നാള് ദിനത്തിനു മുന്നോടിയായി കാണാനെത്തിയ മാധ്യമപ്രവര്ത്തകര്ക്കു മുന്നില് പഴയകാല അനുഭവങ്ങളും ഇപ്പോള് നാടു നേരിടുന്ന പ്രശ്നങ്ങളും അവര് പങ്കുവച്ചു.
''എന്നെ മുന്നിര്ത്തി തെരഞ്ഞെടുപ്പില് പ്രചരണം നടത്തി. ഒടുവില് പാര്ട്ടി അധികാരത്തിലേക്ക് എത്തിയപ്പോള് ചവിട്ടി പുറത്താക്കി. വീട്ടില് ഉറങ്ങി കിടന്ന നായനാരെ ഇ.എം.എസ്. വിളിച്ചുവരുത്തി കേരളത്തിന്റെ മുഖ്യമന്ത്രിയാക്കി. ഞാന് ഒരു ചോവത്തി ആയതിനാല് എനിക്ക് മുഖ്യമന്ത്രിയാകാന് കഴിഞ്ഞില്ല. അന്നു തനിക്ക് നേരിടേണ്ടി വന്ന ദുരുനുഭവങ്ങള് തന്നെയാണ് ഇപ്പോഴും തുടരുന്നത്. ''- രാഷ്ട്രീയ ജീവിതത്തില് നേരിട്ട വലിയ ആഘാതത്തെപ്പറ്റി ഗൗരിയമ്മ പറഞ്ഞു.
മുന് സമരനായികയ്ക്കു പലവട്ടം സി.പി.എം. പുനഃപ്രവേശനം വാഗ്ദാനം ചെയ്തെങ്കിലും വര്ഷങ്ങള് പിന്നിട്ടിട്ടും കാര്യങ്ങള് നീളുകയാണ്. ഗൗരിയമ്മയ്ക്ക് താന് ഇപ്പോള് ഇടതുമുന്നണിയിലെ ഘടകകക്ഷിയാണെന്ന വിചാരമാണുളളത്. എന്നാല് ഇപ്പോഴും മുന്നണിയുടെ ഭാഗമായിട്ടില്ലെന്ന് അടുത്ത അനുയായി തിരുത്തി.
'' തന്റെ പിറന്നാള് ആഘോഷം ആരെയും അറിയിക്കുന്നില്ല. ആരെങ്കിലും അറിഞ്ഞെത്തിയാല് ഊണു കഴിച്ചു മടങ്ങാം. കേരളത്തില് സ്ത്രീകള്ക്കുനേരെ അതിക്രമം വര്ധിക്കുകയാണ്. സര്ക്കാരിന് ഇതില് ഒന്നും ചെയ്യാന് കഴിഞ്ഞില്ല. അങ്ങനെ ചെയ്യാന് കഴിഞ്ഞെങ്കില് ഈ വര്ധന ഉണ്ടാകുമായിരുന്നില്ല. സര്ക്കാരിന്റെ പ്രവര്ത്തനങ്ങളില് നല്ലതും ചീത്തയുമായി കാര്യങ്ങള് ഉണ്ട്. എന്നാല് മോശമായ കാര്യങ്ങളാണ് അധികവും നടക്കുന്നത്. സ്ത്രീകള്ക്കുനേരെ നടക്കുന്ന അതിക്രമങ്ങള്ക്കെതിരെ പോരാടാന് തനിക്ക് ഇനിയും ശക്തിയുണ്ട്. പ്രായം തനിക്കൊരു പ്രശ്നമല്ല. കവി ബാലചന്ദ്രന് ചുള്ളിക്കാടിന്റെ കഥാപാത്രമായ ഗൗരിയായും തനിക്ക് ഉയര്ത്തെഴുന്നേല്ക്കാന് കഴിയും.- ഗൗരിയമ്മ പറഞ്ഞു.
ഇപ്പോള് ജെ.എസ്.എസ്. എന്നു പറഞ്ഞു നടക്കുന്നവര് കള്ളന്മാരാണ്. രാജന് ബാബുവും പ്രദീപും സംഞ്ജിത്തും ഒന്നുമല്ല ജെ.എസ്.എസ്. തെരഞ്ഞെടുപ്പു കമ്മിഷന് തന്റെ പാര്ട്ടിക്ക് മാത്രമാണ് അംഗീകാരം തന്നിട്ടുളളത്. അതില് ആരും അവകാശം സ്ഥാപിക്കാന് ശ്രമിക്കരുതെന്നും ഗൗരിയമ്മ പറഞ്ഞു. നാളെ, മിഥുന മാസത്തിലെ തിരുവോണം നാളിലാണ് ഗൗരിയമ്മയുടെ 99-ാം പിറന്നാള്. അമ്പലപ്പുഴ പാല്പായസം അടക്കമുളള സദ്യവട്ടങ്ങളാണ് ഒരുക്കിയിട്ടുളളത്.
