ഒട്ടെറെ വിചിത്ര നിരോധനങ്ങള് സൃഷ്ടിക്കുയും വാര്ത്തകളില് നിറഞ്ഞുനിന്നവരുമാണ് ഖാപ് പഞ്ചായത്തുകള്. ഒരു ഇടവേളയ്ക്ക് ശേഷം പുതിയൊരു വിചിത്ര നിയമവുമായി വീണ്ടും എത്തിയിരിക്കുകയാണ്. പെണ്കുട്ടികള്ക്കല്ല ഇത്തവണ നിയന്ത്രണം. മറിച്ച് ആണ്കുട്ടികള്ക്കാണ് നിയന്ത്രണം ഏര്പ്പെടുത്തിയിരിക്കുന്നത്.
ജട്ട് സമുദായത്തില്പ്പെട്ട ആണ്കുട്ടികള്ക്കാണ് നിരോധനം ഏര്പ്പെടുത്തിയിരിക്കുന്നത്. ഈ സമുദായത്തിലെ ആണ്കുട്ടികള് ഇനി മുതല് നിക്കര് ധരിക്കരുതെന്നാണ് പുതിയ ഉത്തരവ്. ഷാംലി ഗ്രാമത്തിലെ ഖാപ് പഞ്ചായത്താണ് ഉത്തരവിറക്കിയിരിക്കുന്നത്. ചരിത്രപ്രസിദ്ധമായ ഷാംലിയുടെ സംസ്കാരം തിരിച്ചുപിടിക്കാനാണ് ഈ ഉത്തരവെന്ന് ഖാപ് നേതാക്കള് പറയുന്നു.
ഇതുകൂടാതെ പെണ്കുട്ടികളുടെ വിവാഹപ്രായം 15 ആയി കുറക്കുകയും ചെയ്തിട്ടുണ്ട്. മുമ്പ് പെണ്കുട്ടികളെ പൂവാലന്മാരില് നിന്ന് രക്ഷിക്കാന് മൊബൈല് ഫോണ് ഉപയോഗിക്കുന്നതിനും ജീന്സ് ധരിക്കുന്നതിനും നിരോധം ഏര്പ്പെടുത്തിയിരുന്നു. നൂഡില്സ് കഴിക്കുന്നത് ബലാത്സംഗത്തിലേക്ക് നയിച്ചേക്കാമെന്നായിരുന്നു ഹരിയാനയിലെ ഒരു ഖാപ് പഞ്ചായത്ത് നേതാക്കളുടെ കണ്ടുപിടുത്തം.
