പഞ്ച്കുല: മാനഭംഗക്കേസില് സ്വയം പ്രഖ്യാപിത ആള്ദൈവം ഗുര്മീത് റാം റഹീം സിങിനെ കുറ്റക്കാരനെന്ന് കണ്ടെത്തിക്കൊണ്ടുള്ള കോടതി വിധിയില് പ്രതിഷേധിച്ച് വ്യാപക അക്രമം. ഹരിയാനയിലും ചണ്ഡീഗഡിലും പോലീസും ഗുര്മീര് അനുയായികളും ഏറ്റുമുട്ടുകയാണ്. വ്യാപക അക്രമത്തില് 11 ദേര സച്ച സൗദ അനുയായികള് കൊല്ലപ്പെട്ടതായി റിപ്പോര്ട്ടുകള് പുറത്തു വരുന്നുണ്ട്.
പഞ്ച്കുലയിലയാണ് റാം റഹീം ഭക്തര് വ്യാപക അക്രമം അഴിച്ചു വിട്ടിരിക്കുന്നത്. പോലീസ് സ്റ്റേഷനുകള്ക്കും റെയില്വേ സ്റ്റേഷനിലും തീയിട്ടു. മാധ്യമങ്ങളുടെ വാഹനങ്ങള് അക്രമിച്ചു. അക്രമത്തെ തുടര്ന്ന് പഞ്ചാബിലെ അഞ്ച് ജില്ലകളില് കര്ഫ്യൂ പ്രഖ്യാപിച്ചു. രാജ്നാഥ്സിങ് ഹരിയാന പഞ്ചാബ് മുഖ്യമന്ത്രിമാരുമായി സംസാരിച്ചു. ഗുര്മീതിനെതിരായ കോടതി വിധിയെ തുടര്ന്ന് കോടതിയ്ക്ക് പുറത്ത് സൈന്യം ഫ്ളാഗ്മാര്ച്ച് നടത്തുകയും പോലീസ് സ്റ്റേഷനു മുന്നില് നിന്നും അനുയായികളെ നീക്കുകയും ചെയ്തിരുന്നു.
പഞ്ച്കുലയുടെ വിവിധ മേഖലകളില് വൈദ്യൂത ബന്ധവും ഇന്റര്നെറ്റ് കണക്ഷനും വിചേ്ഛദിച്ചിട്ടുണ്ട്. സ്ഥിതി നിയന്ത്രണ വിധേയമാക്കാനായി പോലീസ് ടിയര് ഗ്യാസും ജലപീരങ്കിയും പ്രയോഗിച്ചു. മാധ്യമസ്ഥാപനങ്ങള്ക്കു നേരെയും മാധ്യമപ്രവര്ത്തകര്ക്കു നേരെയും ദേര സച്ച സൗദ പ്രവര്ത്തകര് വ്യാപക അക്രമമാണ് അഴിച്ചു വിട്ടുകൊണ്ടിരിക്കുന്നത്. 2002 ല് ആശ്രമത്തിലെ അന്തേവാസിയായ പെണ്കുട്ടിയെ ബലാത്സംഗം ചെയ്തുവെന്ന കേസിലാണ് 15 വര്ഷത്തിനിപ്പുറം വിധി വന്നിരിക്കുന്നത്. ഏഴു വര്ഷം വരെ തടവുശിക്ഷ ലഭിക്കാവുന്ന കുറ്റമാണ് ഇത്.
