ന്യൂഡല്ഹി: പടക്കവില്പ്പനയ്ക്ക് നിരോധനമേര്പ്പെടുത്തിയ സുപ്രീം കോടതി വിധിക്കെതിരെ എഴുത്തുകാരന് ചേതന് ഭഗത് രംഗത്ത്. തന്റെ ട്വിറ്റര് പോസ്റ്റിലാണ് അദ്ദേഹം പ്രതികരണം അറിയിച്ചിരിക്കുന്നത്.
പടക്കമില്ലാതെ കുട്ടികള്ക്ക് എന്ത് ദീപാവലിയാണെന്നും നിരോധനം അനുചിതമാണെന്നും അദ്ദേഹം ട്വിറ്ററില് കുറിച്ചു. നമ്മുടെ ഏറ്റവും വലിയ ആഘോഷമാണ് ദീപാവലി, വര്ഷത്തില് ഒരു ദിവസം മാത്രമുണ്ടാവുന്ന ആഘോഷം കൊണ്ടാണ് മലിനീകരണം വര്ധിക്കുന്നത്? മലിനീകരണം കുറയ്ക്കാന് നിരോധനമല്ല, പുതിയ കണ്ടെത്തലുകളാണ് വേണ്ടതെന്നും അദ്ദേഹം പറഞ്ഞു.
ദീപാവലിക്ക് പടക്കം ഒഴിവാക്കാന് വാദിക്കുന്നവര് ചോര ചിന്തുന്ന മറ്റ് ആചാരങ്ങള് ഒഴിവാക്കാനും ഇതേ ആവേശം കാണിക്കണമെന്ന് അദ്ദേഹം പറഞ്ഞു. ഹിന്ദു ആചാരങ്ങള്ക്ക് മാത്രം ഇത്തരത്തില് നിരോധനം ഏര്പ്പെടുത്തുന്നത് എന്തുകൊണ്ടാണ്. മുഹ്റത്തിന് ആടിനെ ബലികഴിക്കുന്നത് നിങ്ങള്ക്ക് നിരോധിക്കുമോ എന്നും ചേതന് ട്വിറ്ററില് കുറിച്ചു.
ക്രിസ്മസിന് ക്രിസ്മസ് ട്രീ നിരോധിക്കുന്നത് പോലെയോ ഈദിന് ആടിനെ ഒഴിവാക്കുന്നത് പോലെയോ ആണ് ദീപാവലിക്ക് പടക്കം നിരോധിക്കുന്നത്. നിയന്ത്രണമാവാം. എന്നാല് നിരോധനമാകരുത്. പാരമ്പര്യത്തെ ബഹുമാനിക്കണമെന്നും അദ്ദേഹം ട്വിറ്ററില് കുറിച്ചു.
