കാഞ്ഞിരപ്പള്ളി: വീട്ടുകാരോട് വഴക്കിട്ട് പിണങ്ങി ഒളിച്ചിരുന്ന കുട്ടി ഉറങ്ങിപ്പോയതിനെ തുടര്ന്ന് നാടിനെ മുള്മുനയില് നിര്ത്തിയത് മണിക്കൂറുകളാണ്. നാലു മണിക്കൂറുകള്ക്ക് ശേഷമാണ് നാടിനേയും, വീടിനേയും ഞെട്ടിച്ച കുട്ടിയെ കണ്ടെത്തിയത്.
കാഞ്ഞിരപ്പള്ളി പാറത്തോട് ചിറഭാഗത്തായിരുന്നു സംഭവം. ശനിയാഴ്ച ഉച്ചയ്ക്ക് രണ്ടു മണിയോടെയാണ് ഒന്പതു വയസുകാരനെ കാണാതായ വാര്ത്ത പരന്നത്. വീട്ടുകാരോട് വഴക്കിട്ട് വീടിനു വെളിയില് നില്ക്കുകയായിരുന്ന കുട്ടിയെയാണ് കാണാതായത്. പിണക്കം മാറി കഴിഞ്ഞ് വീട്ടിലേയ്ക്ക് വരുമെന്ന് വീട്ടുകാര് ചിന്തിച്ചു. എന്നാല് മണിക്കൂറിനു ശേഷം കുട്ടി വീട്ടിലേയ്ക്ക് എത്താതായതോടെ വീട്ടുകാര് പരിഭ്രാന്തരായി.
പിന്നാലെ വീട്ടുകാര്ക്കൊപ്പം നാടും കുട്ടിക്കായി തിരച്ചില് തുടങ്ങി. വിവരം അറിയിച്ചതിനെ തുടര്ന്ന് പോലീസും സ്ഥലത്തെത്തി അരിച്ചു പെറുക്കാന് തുടങ്ങി. കൂടെ സമൂഹമാധ്യമങ്ങളിലും കുട്ടിയെ കാണാനില്ലെന്ന സന്ദേശം പരക്കുകയും ചെയ്തു.
മുള്മുനയില് നാടും പോലീസുകാരും തിരച്ചില് നടത്തുന്നതിനിടെയാണ് നിര്ത്തിയിട്ടിരുന്ന കാറിനടിയില് നിന്ന് കാല് തട്ടിയ ശബ്ദം നാട്ടുകാരില് ഒരാള് കേട്ടത്. പിന്നാലെ കാറിനടിയില് നോക്കുമ്പോള് കുട്ടി ഇതൊന്നും അറിയാതെ നല്ല ഉറക്കത്തിലായിരുന്നു. കാറിനു സമീപത്ത് ഒളിച്ചിരുന്ന കുട്ടി ഉറങ്ങിപ്പോകുകയായിരുന്നു.
