പൂനെ: നായികയുടെ ഫോണ്വിളി ശല്യം സഹിക്കാനാകാതെ മുങ്ങിയ കാമുകനെ പൊക്കാന് യുവതി നടത്തിയ കൂട്ടബലാത്സംഗ നാടകത്തില് വലഞ്ഞത് പോലീസ്. പൂണെ കോണ്ഡ്വാ പോലീസിനെ വട്ടം കറക്കിയ കേസില് കാമുകനെ കണ്ടെത്തിയ പോലീസ് പരാതി വ്യാജമാണെന്ന് തിരിച്ചറിഞ്ഞതോടെ കേസെടുക്കാതെ ഇരുവരെയും വെറുതേ വിട്ടു. ലത്തൂരുകാരായ കാമുകീകാമുകന്മാരാണ് പോലീസിനെ വട്ടം കറക്കിയത്.
ലത്തൂരിലെ 27 കാരി കഥയിലെ നായിക. ദീര്ഘനാളായി പ്രണയത്തിലായിരുന്നു ഇവര് ഫോണ് വിളിച്ചിട്ട് കാമുകന് പ്രതികരിക്കാതെ വന്നതോടെയാണ് യുവതി കാമുകനും കൂട്ടുകാരും തന്നെ കൂട്ട ബലാത്സംഗം ചെയ്തെന്ന് പോലീസില് പരാതി നല്കിയത്. കാമുകനെ പിടികൂടിയപ്പോള് ഇരുവരും പ്രണയത്തിലാണെന്നും വിവാഹം കഴിക്കാനിരിക്കുകയാണെന്നും തിരിച്ചറിഞ്ഞ പോലീസ് ഇതോടെ നിയമനടപടികള്ക്കപ്പുറത്ത് മനുഷ്യത്വത്തിന് പ്രാധാന്യം നല്കി രണ്ടു പേര്ക്കെതിരേയും കേസെടുക്കാതെ വെറുതെ വിടാന് തയ്യാറായി.
ലത്തൂരുകാരാണ് കാമുകനും കാമുകിയും. അടുത്തിടെയാണ് കാമുകന് പണിയന്വേഷിച്ച് പൂനെയ്ക്ക് പോയത്. എന്നാല് കാമുകി ഇയാളെ പിന്തുടരുക ആയിരുന്നു. ഒക്ടോബര് 9 ന് ഇവര് കാമുകനെ തേടി പൂനെയില് എത്തിയെങ്കിലും കാമുകനെ കണ്ടെത്താനായില്ല. തുടര്ന്നാണ് കണ്ടെത്താന് കാമുകനെതിരേ കൂട്ടബലാത്സംഗ പരാതി നല്കിയത്. തന്നെ കാമുകനും അയാളുടെ സഹോദരനും സുഹൃത്തുക്കളും ചേര്ന്ന് മര്ദ്ദിക്കുകയും കൂട്ടബലാത്സംഗം നടത്തുകയും ചെയ്തതായി പരാതിയില് പറഞ്ഞു. തുടര്ന്ന് കേസെടുത്ത പോലീസ് കാമുകനായി തെരച്ചില് ആരംഭിക്കുകയും ഒരാഴ്ച കൊണ്ട് കണ്ടു പിടിക്കുകയും ചെയ്തു.
ഇരുവരും പ്രണയികളാണെന്ന് തിരിച്ചറിഞ്ഞ പോലീസ് നടത്തിയ ചോദ്യം ചെയ്യലില് താന് പെണ്കുട്ടിയുമായി പ്രണയത്തിലാണെന്നും എന്നാല് അവര് നിരന്തരം ഫോണ് വിളിച്ചും മെസേജ് അയച്ചും ബുദ്ധിമുട്ടിക്കാന് തുടങ്ങിയതോടെ വലഞ്ഞു പോയെന്നും പറഞ്ഞു. താന് കാമുകി പൂനെയില് എത്തിയ കാര്യം അറിഞ്ഞിരുന്നില്ലെന്നുഗ പറഞ്ഞു. പിന്നീട് യുവതിയെ പോലീസ് സ്റ്റേഷനിലേക്ക് വിളിച്ചു വരുത്തിയ പോലീസ് അവരേയും ചോദ്യം ചെയ്ത ശേഷം പിന്നീട് വിട്ടയയ്ക്കുകയായിരുന്നു. ഒക്ടോബര് 27 ന് ഇരുവരും വിവാഹിതരായി.
