സ്നാക്സിനൊപ്പം പായ്ക്കറ്റിലെ റബര് പാവ കഴിച്ച നാല് വയസ്സുകാരന് മരിച്ചു. വെസ്റ്റ്ഗോദാവരിയിലാണു സംഭവം. അമ്മയോടൊപ്പം പാല് വാങ്ങാന് കടയില് പോയ കുഞ്ഞ് തക്കാളിരുചിയുള്ള സ്നാക് വാങ്ങുകയും വീട്ടിലേക്കു മടങ്ങും വഴി അതു ഭക്ഷിക്കുകയും ചെയ്തു. സ്നാക്സ് പാക്കറ്റിനുള്ളില് ഒരു ചെറിയ റബര് പാവയുമുണ്ടായിരുന്നു. എന്നാല് അതും ഭക്ഷ്യയോഗ്യമാണെന്ന ധാരണയില് കുഞ്ഞ് കഴിക്കുകയായിരുന്നു. എന്നാല് പാവ കുട്ടിയുടെ തൊണ്ടയില് കുടുങ്ങുകയും കുട്ടി ശ്വാസമെടുക്കാന് ബുദ്ധിമുട്ടുകയുമായിരുന്നു.
വീടിനു സമീപത്തുള്ള ഗ്രൗണ്ടില് കുഞ്ഞു കുഴഞ്ഞു വീഴുന്നതുകണ്ട ബന്ധുക്കള് ഓടിയെത്തുമ്പോഴേക്കും അവന്റെ വായില് നിന്നും നുരയും പതയും വന്നു തുടങ്ങിയിരുന്നു. കുഞ്ഞിന്റെ തൊണ്ടയില് നിന്ന് പാവ എടുക്കാന് ശ്രമിച്ചെങ്കിലും സാധിച്ചില്ല. ഉടന് തന്നെ അവനെ അടുത്തുള്ള ഗവണ്മെന്റ് ആശുപത്രിയിലെത്തിച്ചെങ്കിലും അവിടെവെച്ച് കുട്ടി മരിക്കുകയായിരുന്നു. കുഞ്ഞിന്റെ അച്ഛന്റെ പരാതിയെത്തുടര്ന്ന് പൊലീസ് കേസ് രജിസ്റ്റര് ചെയ്തിട്ടുണ്ട്.
