ആഗ്ര: കാണാതായ 11 വയസുകാരനെ കണ്ടെത്തുന്നതിന് പിതാവിന്റെ സമാനതകളില്ലാത്ത പോരാട്ടം. കണാതായ മകനെ തിരഞ്ഞ് കര്ഷകന് സൈക്കിള് ചവുട്ടിയത് 2000 കിലോമീറ്റര്. ആഗ്ര സ്വദേശിയായ സതീഷ് ചന്ദ്ര എന്ന കര്ഷകനാണ് തന്റെ മകന് ഗോദ്നയെ തിരഞ്ഞ് രാജ്യത്തെ റെയില്വേ ട്രാക്കുകള്ക്ക് സമാന്തരമായി 2000 കിലോമീറ്റര് സൈക്കിള് ചവുട്ടിയത്. ഇക്കഴിഞ്ഞ ജൂണ് മാസത്തില് കാണാതായ മകനെ തിരഞ്ഞ് ഇദ്ദേഹം ഡല്ഹി, ഝാന്സി, കാണ്പൂര്, ബിന എന്നിവടങ്ങളിലേക്കെല്ലാം സൈക്കിളില് യാത്ര ചെയ്തു.
കയ്യില് മകന്റെ ഒരു ഫോട്ടോയുമായാണ് സതീഷ് ചന്ദ്രയുടെ സഞ്ചാരം. സതീഷ് ചന്ദ്രയുടേയും ഭാര്യയുടേയും ഏകമകനാണ് കാണാതായ ഗോദ്ന. ഒരു മകള് ഉണ്ടായിരുന്നത് ട്രാക്ടര് കയറി മരിക്കുകയും മറ്റൊരു മകന് അസുഖ ബാധിതനായി മരിക്കുകയുമായിരുന്നു. അല്പ്പം ബുദ്ധിമാന്ദ്യവും സംസാര വൈകല്യവുമുള്ളയാളാണ് കാണാതായ ഗോദ്ന. ജൂണ് 24നാണ് കുട്ടിയെ കാണാതായത്. ഹത്രാസിലെ മദ്രക് റെയില്വേ സ്റ്റേഷന് സമീപമാണ് കുട്ടിയെ അവസാനമായി കണ്ടത്.
പോലീസില് പരാതി നല്കിയെങ്കിലും ഫലപ്രദമായ അന്വേഷണം നടന്നില്ല. ഇതേതുടര്ന്നാണ് സതീഷ് ചന്ദ്ര സ്വന്തമായി അന്വേഷണം തുടങ്ങിയത്. മകന് അജ്ഞാത സ്ഥലത്തേക്ക് ട്രെയിനില് കയറി പോയിരിക്കാമെന്നാണ് സതീഷ് ചന്ദ്രയുടെ നിഗമനം. ഇതേതുടര്ന്നാണ് റെയില്വേ ട്രാക്കുകള്ക്ക് സമാന്തരമായി സഞ്ചരിക്കാന് ഇയാള് തീരുമാനിച്ചത്. തന്റെ കൈവശമുള്ള മകന്റെ ഫോട്ടോ ട്രെയിന് യാത്രക്കാരെ കാണിച്ചു കൊണ്ടാണ് ഇയാള് മകന് വേണ്ടിയുള്ള അന്വേഷണം തുടരുന്നത്.
