തിരുവനന്തപുരം: ഓഖി ചുഴലിക്കാറ്റില്പെട്ട് തിരുവനന്തപുരത്ത് മാത്രം 201 പേര് ഇനിയും തിരിച്ചെത്താനുണ്ടെന്ന് ലത്തീന് രൂപത. ഇതില് ചെറുവള്ളങ്ങളില് പോയ 108 മത്സ്യത്തൊഴിലാളികളുടെ കാര്യത്തിലാണ് കൂടുതല് ആശങ്കയെന്നും രൂപത വ്യക്തമാക്കി. തിരുവനന്തപുരം വെള്ളയമ്പലത്തെ സഭാ ആസ്ഥാനത്ത് നടത്തിയ വാര്ത്താ സമ്മേളനത്തിലാണ് സഭ കൂടുതല് കാര്യങ്ങള് വെളിപ്പെടുത്തിയത്.
മുന്നറിയിപ്പ് മത്സ്യത്തൊഴിലാളികളെ കൃത്യമായി അറിയിക്കാത്തത് ദുരന്തത്തിന്റെ ആഘാതം ഇരട്ടിയാക്കിയെന്നും സഭാ നേതൃത്വം ആരോപിച്ചു. എത്രപേര് സുരക്ഷിതര് എന്ന് പറയാന് രക്ഷാപ്രവര്ത്തകര്ക്ക് കഴിയുന്നില്ലന്നും, ആറു ദിവസമായിട്ടും കടലില് കുടുങ്ങിപ്പോയവരെ തിരിച്ചെത്തിക്കാന് കഴിയാത്തത് അപമാനകരമാണെന്നും സഭാ കുറ്റപ്പെടുത്തി.
അതേസമയം, സംസ്ഥാന സര്ക്കാരിന്റെ വാദങ്ങള് പൊളിച്ചുകൊണ്ടുള്ള കാലാവസ്ഥാ നിരീക്ഷണ കേന്ദ്രത്തിന്റെ രേഖകള് പുറത്തു വന്നു. കേരളാ തീരത്ത് രൂക്ഷമായ കടല്ക്ഷോഭമുണ്ടാകുമെന്നും മത്സ്യത്തൊഴിലാളികള് കടലില് പോകരുതെന്നുമുള്ള സന്ദേശങ്ങള് നവംബര് 29 ന് തന്നെ നാലു തവണ സംസ്ഥാന സര്ക്കാരിനു നല്കിയിരുന്നുവെന്ന വ്യക്തമാക്കുന്ന രേഖകളാണ് പുറത്തു വന്നിരിക്കുന്നത്. കേന്ദ്ര പ്രതിരോധ മന്ത്രി നിര്മ്മലാ സീതാരാമന് കേരളത്തില് എത്തിയപ്പോഴും ഇക്കാര്യം വ്യക്തമാക്കിയിരുന്നു.
