കെയ്റോ: അവിടവും ഇവിടവും കീറിയ ജീന്സിട്ട് നടക്കുന്ന പെണ്ണുങ്ങളെ ബലാത്സംഗം ചെയ്യുകയാണ് രാജ്യസ്നേഹികളായ പുരുഷന്മാരുടെ ലക്ഷണവും കര്ത്തവ്യവും. പ്രമുഖ ഈജിപ്ഷ്യന് അഭിഭാഷകന്റേതാണ് വിവാദ പ്രസ്താവന. സംഗതി വിവാദമായതോടെ അഭിഭാഷകനെ മൂന്ന് വര്ഷം തടവുശിക്ഷയ്ക്ക് വിധിച്ചു. സ്ത്രീപീഡനത്തിന് ആഹ്വാനം ചെയ്തതിന്റെ പേരില് 20,000 ഈജിപ്ഷ്യന് പൗണ്ട് പിഴയും ശിക്ഷിച്ചിട്ടുണ്ട്.
ഒക്ടോബറില് നടന്ന ഒരു ടെലിവിഷന് ചര്ച്ചയില് പങ്കെടുത്ത സംസാരിക്കവേ നാബി അല് വാഹ്ഷ് എന്ന അഭിഭാഷകനാണ് വിവാദത്തില് തലയിട്ട് ശിക്ഷ വാങ്ങിയത്. ശരീരത്തിന്റെ പിന്ഭാഗം പകുതിയോളം തുറന്നുകാട്ടി ഒരു പെണ്കുട്ടി നഗരത്തിലൂടെ പരസ്യമായി നടക്കുന്നത് നിങ്ങള്ക്ക് സന്തോഷം പകരുമോ എന്ന് ചോദിച്ച നാബി അങ്ങിനെ ഒരുത്തി നടന്നാല് അവളെ ലൈംഗികമായി പീഡിപ്പിക്കുകയാണ് ഒരു രാജ്യസ്നേഹിയുടെ ചുമതല. ബലാത്സംഗം ചെയ്യുകയാണ് ദേശീയകര്ത്തവ്യമെന്ന് താന് പറയുമെന്നു വ്യക്തമാക്കിയ നബി വേശ്യാവൃത്തിക്ക് പുതിയ നിയമം തന്നെ രാജ്യത്ത് കൊണ്ടുവരണമെന്നും പറഞ്ഞു.
അതിര്ത്തി സംരക്ഷിക്കുന്നതിനേക്കാള് പ്രധാനമാണ് സദാചാരസംരക്ഷണം. ശരീരം അനാവൃതമാക്കി നടക്കുന്ന ഒരു സ്ത്രീ അവളെ ശല്യം ചെയ്യാനും ബലാത്സംഗം നടത്താനും ഒരു പുരുഷനെ ക്ഷണിക്കുക കൂടിയാണ് ചെയ്യുന്നത്. അതിന് വഴി വെയ്ക്കാതെ സ്വയംബഹുമാനിതയാകാന് പഠിക്കണം. അവളെ മോശമാക്കുന്നത് അവള് തന്നെയാണ്. സ്വയം ബഹുമാനിച്ചാല് മറ്റുള്ളവരും അവളെ ബഹുമാനിക്കും. നാബി പറഞ്ഞു. അതേസമയം നാബിയുടെ പ്രസ്താവന രാജ്യത്തെ വനിതാ കൗണ്സിലും സ്ത്രീപക്ഷ വാദികളും ഏറ്റെടുക്കുകയും ബലാത്സംഗത്തെയും ലൈംഗിക പീഡനത്തെയും പ്രോത്സാഹിപ്പിക്കുന്നതാണെന്ന് വിമര്ശിക്കുകയും ചെയ്തു.
അതേസമയം നാബി ഇത്തരം വിവാദം ഉണ്ടാക്കുന്നത് ഇതാദ്യമല്ല. കഴിഞ്ഞ വര്ഷം ഒരു ടെലിവിഷന് ലൈവ് ഷോയ്ക്കിടെ ഹിജാബ് ധരിക്കുന്നത് സ്ത്രീകളുടെ ഇഷ്ടമാണെന്നും അവരെ നിര്ബ്ബന്ധിക്കാന് കഴിയില്ലെന്നും പറഞ്ഞ ഒരു ഇമാമിനെ ഇയാള് മര്ദ്ദിച്ചിരുന്നു. അതിന് മുമ്പ് മറ്റൊരു ഷോയില് മാസമുറയില് നില്ക്കുമ്പോള് പോലും സ്ത്രീകള് ഫത്വ പുറപ്പെടുവിക്കുമെന്നും പറഞ്ഞു. സ്ത്രീകളെ ഇസ്ളാമിക പണ്ഡിതരാകാന് അനുവദിക്കാതിരിക്കുന്ന നിയമം നടപ്പാക്കണമെന്നും നരകത്തില് പതിക്കാന് ഇതെല്ലാം ധാരാളമാണെന്നും പറഞ്ഞു.
