ആലപ്പുഴ: പുതുവത്സരത്തില് ധനമന്ത്രി ഡോ. ടി. എം. തോമസ് ഐസക്കിന്റെ മണ്ഡലത്തിലെത്തിയാല് കീശയുടെ കനം നഷ്ടമാക്കാതെ ഉച്ചഭക്ഷണം കഴിക്കാം. ഊണ് ഇരുപതു രൂപയ്ക്കു ലഭിക്കും. സാമ്പാര്, തോരന്, അച്ചാര്, മീന്കറി എന്നിവയാകും വിഭവങ്ങള്. മണ്ഡലത്തില് ആരംഭിച്ച വിശപ്പുരഹിത മാരാരിക്കുളം പദ്ധതിയുടെ ഭാഗമായാണ് കേന്ദ്രീകൃത അടുക്കളകളിലൂടെ ചുരുങ്ങിയ ചെലവില് പൊതുജനങ്ങള്ക്കു കൂടി ഊണ് ലഭ്യമാക്കാന് ഒരുങ്ങുന്നത്.
കിടപ്പുരോഗികള്ക്കും ആശ്രയമില്ലാത്തവര്ക്കുമാണ് വിശപ്പുരഹിത മാരാരിക്കുളം പദ്ധതിയിലൂടെ സൗജന്യമായി ഭക്ഷണം എത്തിച്ചുകൊടുക്കുന്നത്. സംസ്ഥാന സര്ക്കാര് തിരുവനന്തപുരം, ആലപ്പുഴ നഗരങ്ങളില് ആരംഭിക്കാന് തീരുമാനിച്ച വിശപ്പുരഹിത കേരളം പദ്ധതിയുടെ ചുവടുപിടിച്ചാണ് മന്ത്രി ഐസക്കിന്റെ ആലപ്പുഴ മണ്ഡലത്തില് ഭക്ഷണ വിതരണത്തിന് ഒരുങ്ങുന്നത്. ഒമ്പതുപാലിയറ്റീവ് കെയര് സൊെസെറ്റികളുടെ സഹകരണത്തോടെയാണിതു നടപ്പാക്കുക.
ജനുവരി ഒന്നു മുതല് ദേശീയപാത 66ല് പാതിരപ്പള്ളിയിലും ആലപ്പുഴ തണ്ണീര്മുക്കം റോഡില് മണ്ണഞ്ചേരിയിലുമാകും ഔട്ട്ലെറ്റുകള് തുറക്കുക. നാല്പതു രൂപയുടെ ഊണാണ് ഇവിടെ പകുതി വിലയ്ക്കു നല്കുകയെന്ന് മന്ത്രി തോമസ് ഐസക്ക് പറഞ്ഞു. ഭക്ഷ്യ സിവില് സെപ്ലെസ് വകുപ്പില്നിന്ന് പ്രത്യേക ഇളവില് അരി ഉള്പ്പടെയുള്ള ഭക്ഷ്യസാധനങ്ങള് ലഭ്യമാക്കാമെന്ന് ഉറപ്പു ലഭിച്ചിട്ടുണ്ട്. ഒപ്പം അഭ്യുദയകാംക്ഷികളുടേയും സന്നദ്ധസംഘടനകളുടേയും സഹായങ്ങളും സ്വീകരിക്കും.
ക്രമേണ കലവൂര് ഉള്പ്പടെയുള്ള രണ്ടു കേന്ദ്രങ്ങളില്ക്കൂടി ഔട്ട്ലെറ്റുകള് തുറക്കും. ഭക്ഷണം കഴിക്കുന്നവരില് താല്പര്യമുള്ളവര്ക്ക് ഒരു കൂപ്പണ് വാങ്ങി കവാടത്തില് സ്ഥാപിച്ചിട്ടുള്ള പെട്ടിയില് നിക്ഷേപിക്കാം. ഇരുപതു രൂപ നല്കാനില്ലാത്തവര്ക്ക് ഈ കൂപ്പണ് നല്കി ഭക്ഷണം കഴിക്കാം.
