കൊച്ചി: കോടതിക്കു പുറത്ത് അഡ്വ. ബി.എ. ആളൂരിനെതിരേ വീണ്ടും പൊട്ടിത്തെറിച്ച് രാജേശ്വരി. കഴിഞ്ഞ ദിവസം കേസില്‍ അന്തിമ വാദം നടക്കുന്നതിനിടെ കോടതിമുറിക്കുള്ളില്‍ വച്ചും രാജേശ്വരി ക്ഷോഭിച്ചിരുന്നു. ആളൂരിനെയും ശിക്ഷിക്കണമെന്ന് ആവശ്യപ്പെട്ട് കോടതിമുറിയില്‍ ബഹളംവച്ച ഇവരെ പോലീസ് ഇടപെട്ടാണു നീക്കിയത്.
ഇന്നലെ ശിക്ഷയിന്മേലുള്ള അന്തിമവാദത്തിനുശേഷം അഡ്വ. ആളൂര്‍ മാധ്യമങ്ങളോടു സംസാരിച്ചു നില്‍ക്കവേയാണു രാജേശ്വരിയെത്തിയത്. ''എന്റെ കൊച്ചിനു നീതി നല്‍കാതെ പ്രതിക്ക് നീതിമേടിച്ചു നല്‍കാന്‍ നില്‍ക്കുവാണോ''യെന്ന് ഉറക്കെ വിളിച്ചു ചോദിച്ചുകൊണ്ടായിരുന്നു രാജേശ്വരിയെത്തിയത്. ഒപ്പമുള്ള പോലീസുകാര്‍ ഇവരെ പിടിച്ചുമാറ്റി. ഇന്നലെ ശിക്ഷ വിധിക്കാതിരുന്നത് ആളൂരിന്റെ വാദം നീണ്ടുപോയതുകൊണ്ടാണെന്നു രാജേശ്വരി പരാതിപ്പെട്ടു. കൂടെയുള്ളവര്‍ ഏറെ പണിപ്പെട്ടാണ് ഇവരെ കോടതി വളപ്പിനു പുറത്തേക്കു കൊണ്ടുപോയത്. ജിഷക്കേസില്‍ അമീര്‍ ഉള്‍ ഇസ്ലാമിന്റെ ശിക്ഷാകാര്യത്തില്‍ വാദപ്രതിവാദം നീണ്ടതു മണിക്കൂറുകള്‍.
നിര്‍ഭയക്കേസിനെ കൂട്ടുപിടിച്ചു പ്രോസിക്യൂഷന്‍, ജസ്റ്റിസ് കൃഷ്ണയ്യരുടെ വാക്കുകള്‍ കടമെടുത്തു പ്രതിഭാഗം. ജിഷാ വധക്കേസില്‍ ഇന്നലെ വിധിയുണ്ടാകുമെന്നു കരുതി കോടതിമുറിയിലും പരിസരത്തും ആളുകള്‍ തടിച്ചുകൂടിയിരുന്നു. രാവിലെ 10.30 നു കോടതി മുറി അഭിഭാഷകരെയും കോടതി ജീവനക്കാരെയും കാഴ്ചക്കാരെയുംകൊണ്ടു നിറഞ്ഞു. ജിഷയുടെ അമ്മ രാജേശ്വരിയും എ.ഡി.ജി.പി. ബി. സന്ധ്യയുടെ നേതൃത്വത്തില്‍ അന്വേഷണ സംഘവും വിധികേള്‍ക്കാനെത്തി.
പതിനൊന്നിനു കോടതി നടപടികള്‍ തുടങ്ങി. അമീര്‍ ഉള്‍ ഇസ്ലാമിനെ വന്‍ പോലീസ് സന്നാഹത്തില്‍ കോടതിയിലെത്തിച്ചു. ശിക്ഷയെക്കുറിച്ച് എന്തെങ്കിലും പറയാനുണ്ടോയെന്നു ജഡ്ജി അമീറിനോടു ചോദിച്ചു. ജിഷയെ അറിയില്ലെന്നും കുറ്റക്കാരനല്ലെന്നും മറുപടി. അച്ഛനെയും അമ്മയെയും കാണണമെന്നും ആവശ്യം. വയസ് എത്രയെന്ന ചോദ്യത്തിന്, 23 എന്നു മറുപടി. തുടര്‍ന്ന് വാദം ആരംഭിക്കാന്‍ പ്രോസിക്യൂഷനോടു കോടതി ആവശ്യപ്പെട്ടു. 11.25 നു നിര്‍ഭയക്കേസിനെ കൂട്ടുപിടിച്ചു പ്രോസിക്യൂട്ടര്‍ എന്‍.കെ. ഉണ്ണികൃഷ്ണന്‍ വാദം തുടങ്ങി. പ്രതിയുടെ മാനസിക ക്രൂരതയെ പരാമര്‍ശിച്ച് വാദം നിര്‍ത്തുമ്പോള്‍ സമയം 12.10. തുടര്‍ന്നായിരുന്നു പ്രതിഭാഗത്തിന്റെ വാദം.
ആയിരം കുറ്റവാളികള്‍ രക്ഷപ്പെട്ടാലും ഒരു നിരപരാധി പോലും ശിക്ഷിക്കപ്പെടരുതെന്ന മഹത്‌വചനവും വധശിക്ഷ മറ്റൊരു കൊലപാതകമാണെന്ന ജസ്റ്റിസ് കൃഷ്ണയ്യരുടെ വാക്കുകളും കടമെടുത്തായിരുന്നു പ്രതിഭാഗം അഭിഭാഷകനായ ബി.എ. ആളൂരിന്റെ വാദം. വിചാരണാ വേളയില്‍ പറഞ്ഞവ ആവര്‍ത്തിച്ചപ്പോഴും ഡി.എന്‍.എ. പരിശോധന ഉള്‍പ്പെടെയുള്ള കാര്യങ്ങള്‍ വാദത്തില്‍ വന്നപ്പോഴും കോടതി ഇടപ്പെട്ടു. വാദങ്ങള്‍ ആവര്‍ത്തിക്കേണ്ടെന്നു നിര്‍ദേശം. വാദം നീണ്ടപ്പോള്‍ ആളുകള്‍ അസ്വസ്ഥരായി തുടങ്ങി.
കോടതി ജീവനക്കാരും അഭിഭാഷകവിദ്യാര്‍ഥികളും കോടതിമുറിയില്‍ മാറിമാറിയെത്തി. സൗമ്യയെയും ഗോവിന്ദച്ചാമിയെയുമൊക്കെ പരാമര്‍ശിച്ച് ഒടുവില്‍ ആളൂര്‍ വാദം നിര്‍ത്തുമ്പോള്‍ സമയം 1.35. ഇതോടെ ജഡ്ജി പറഞ്ഞുനിര്‍ത്തി; വിധി നാളെ. നിരാശരായി അന്വേഷണ സംഘവും ആള്‍ക്കൂട്ടവും പുറത്തേക്ക്. ഇന്നു രാവിലെ 11 ന് വിധി പറയാന്‍ കോടതി ചേരും.
Comments