തിരുവനന്നപുരം: ഓഖി ദുരന്തത്തില്പെട്ടവരെ കണ്ടെത്തണമെന്ന ആവശ്യപ്പെട്ട് ലത്തീന്സഭ ഹൈക്കോടതിയിലേക്ക്. സര്ക്കാരിന്റെ വാദങ്ങളില് വിശ്വാസമില്ലാത്തതിനെ തുടര്ന്ന് ഹൈക്കേസാടതിയില് ഹേബിയസ് കോര്പ്പസ് ഹര്ജി ഫയല് ചെയ്യാനാണ് സഭ ഒരുങ്ങുന്നത്. ഓഖി ദുരന്തം നടന്ന് 16 ദിവസങ്ങള് കഴിഞ്ഞിട്ടും ഇപ്പോഴും കടലില് തെരച്ചില് തുടരുകയാണ്. ഓഖി ദുരന്തം പാര്ലമെന്റില് ചര്ച്ചചെയ്യണമെന്ന ആവശ്യവും ഉയരുന്നതിനിടയിലാണ് സഭ കോടതിയില് എത്താനൊരുങ്ങുന്നത്.
ഓഖി ചുഴലിക്കാറ്റില് കടലില് കാണാതായ 242 പേര് ഇനിയും മടങ്ങിവരാനുണ്ടെന്നാണ് സഭയുടെ കണ്ടെത്തല്. ഇവരെ തിരികെ കൊണ്ടുവരാന് സര്ക്കാര് ഒരു നടപടിയും സ്വീകരിക്കുന്നില്ലെന്നും ആരോപിക്കുന്നു. നൂറിലധികം പേര് വീതം തിരുവനന്തപുരത്തു നിന്നും എറണാകുളത്ത് നിന്നും കാണാതായിട്ടുണ്ടെന്നും സഭ വ്യക്തമാക്കുന്നു. 117 പേര് തിരുവനന്തപുരത്ത് നിന്നും കാണാതായെന്നാണ് സര്ക്കാര് പറയുന്നത്. എന്നാല് വീടു വീടാന്തരം നടന്ന എടുത്ത കണക്കുകള് പ്രകാരം 119 പേരെ ഇനിയും കാണാനുണ്ടെന്നും നൂറിലധികം പേരെ എറണാകുളത്ത് നിന്നും കാണാനുണ്ടെന്നാണ് സഭ പറയുന്നത്. സര്ക്കാര് വേണ്ട വിധത്തിലുള്ള നടപടി സ്വീകരിക്കാത്തതിനാലാണ് സഭ കോടതിയെ സമീപിക്കുന്നതിലേക്ക് നീങ്ങുന്നത്.
വിഷയം ചര്ച്ച ചെയ്യണമെന്ന് ഇടതുപക്ഷവും ആവശ്യപ്പെട്ടു. രാജ്യസഭയില് പാര്ലമെന്റ് നടപടികള് നിര്ത്തിവെച്ച് ചര്ച്ച ചെയ്യണമെന്ന് ആവശ്യപ്പെട്ട് കെ.കെ.രാഗേഷ് പാര്ലമെന്റില് നോട്ടീസ് നല്കി. രണ്ടു സഭകളിലും സിപിഎം നോട്ടീസ് നല്കിയിട്ടുണ്ട്. ഫിഷറീസ് വകുപ്പിന്റെയും തീരദേശസേനയുടെയും ബോട്ടുകളും മത്സ്യത്തൊഴിലാളികളുടെ വള്ളങ്ങളും കോഴിക്കോട് തെരച്ചിലിലാണ്. മൂടല്മഞ്ഞും മറ്റും തെരച്ചില് ജോലികള്ക്ക് തടസ്സം സൃഷ്ടിക്കുകയാണ്.
