മുസാഫര്നഗര്: 2013ലെ മുസാഫര്നഗര് വര്ഗീയ കലാപക്കേസില് ഉത്തര്പ്രദേശ് മന്ത്രിക്കും ബി.ജെ.പി എം.എല്.എമാര്ക്കുമെതിരെ കോടതി ജാമ്യമില്ലാ വാറണ്ട് പുറപ്പെടുവിച്ചു. യു.പി മന്ത്രി സുരേഷ് റാണ, മുന് കേന്ദ്രമന്ത്രി സഞ്ജീവ് ബാല്യന്, ബി.ജെ.പി എം.എല്.എമാരായ ഉമേഷ് മാലിക്, സംഗീത് സോം തുടങ്ങിയവര്ക്കെതിരെയാണ് വാറണ്ട്. ഇവരെ പ്രോസിക്യുട്ട് ചെയ്യാന് സംസ്ഥാന സര്ക്കാര് അനുമതി നല്കിയതിനെ തുടര്ന്നാണ് കോടതി നടപടി.
മുസാഫര്നഗര് അഡീഷണല് ചീഫ് ജുഡീഷ്യല് മജിസ്ട്രേറ്റ് മധു ഗുപ്തയാണ് വാറണ്ട് പുറപ്പെടുവിച്ചത്. ജനുവരി 19ന് കോടതിയില് ഹാജരാകണമെന്നാണ് നിര്ദ്ദേശം. മുസാഫര്നഗര് കലാപം അന്വേഷിക്കുന്ന പ്രത്യേക അന്വേഷണ സംഘത്തിന്റെ ആവശ്യപ്രകാരമാണ് മന്ത്രിമാരേയും എം.എല്.എമാരേയും പ്രോസിക്യൂട്ട് ചെയ്യാന് സംസ്ഥാന സര്ക്കാര് അനുമതി നല്കിയത്. വിദ്വേഷ പ്രസംഗത്തിലൂടെ കലാപത്തിന് പ്രേരണ നല്കിയെന്ന കുറ്റമാണ് ബി.ജെ.പി മന്ത്രിക്കും എം.എല്.എമാര്ക്കുമെതിരെ ചുമത്തപ്പെട്ടിരിക്കുന്നത്.
ഐപിസി സെക്ഷന് 153എ പ്രകാരമാണ് ഇവര്ക്കെതിരെ കേസെടുത്തിരിക്കുന്നത്. നിരോധനാജ്ഞ ലംഘിച്ചതിനും പോലീസിന്റെ ജോലി തടസപ്പെടുത്തിയതും അടക്കം നിരവധി കേസുകള് ഇവര്ക്കെതിരെ ചുമത്തപ്പെട്ടിട്ടുണ്ട്. 2013 ഓഗസ്റ്റ്-സെപ്റ്റംബര് മാസങ്ങളിലാണ് മുസാഫര്നഗറില് വര്ഗീയ കലാപം നടന്നത്. കലാപാത്തില് അറുപത് പേര് കൊല്ലപ്പെടുകയും നാല്പ്പതിനായിരത്തോളം പേര് വീടുവിട്ട് പലായനം ചെയ്യുകയുമുണ്ടായി.
