ന്യൂഡല്ഹി: ഇന്ത്യയുടെ ഏറ്റവും കരുത്തുറ്റ പ്രധാനമന്ത്രിയെന്ന് വിശേഷണമുള്ളയാളും കോണ്ഗ്രസിന്റെ വലിയ നേതാക്കളില് ഒരാളുമായി ഇന്ദിരാഗാന്ധിക്ക് പോലും കിട്ടാത്ത നേട്ടമാണ് ബിജെപി ഇപ്പോള് ഉണ്ടാക്കിയിരിക്കുന്നതെന്ന് പ്രധാനമന്ത്രി നരേന്ദ്രമോഡി. ഇന്ദിരാഗാന്ധിയുടെ കോണ്ഗ്രസ് 18 സംസ്ഥാനങ്ങളില് അടക്കിഭരിച്ചെങ്കില് ബിജെപി ഇപ്പോള് അത് 19 സംസ്ഥാനങ്ങളിലാക്കിയെന്ന് മോഡി പറഞ്ഞു.
ഗുജറാത്ത്, ഹിമാചല് പ്രദേശ് സംസ്ഥാനങ്ങളില് ഭരണം പിടിച്ചതിന് പിന്നാലെ നടന്ന ആദ്യ പാര്ലമെന്ററിപാര്ട്ടിയോഗത്തിലായിരുന്നു മോഡി ഇക്കാര്യം ബോധിപ്പിച്ചത്. ബിജെപി നേടിയത് ചരിത്ര നേട്ടമാണെന്നും പറഞ്ഞു. ഗുജറാത്തില് മികച്ച പ്രകടനം നടത്തിയെന്ന രാഹുലിന്റെ പരാമര്ശത്തെ തോല്വിയെ വിജയമാക്കി ചിത്രീകരിച്ച് തമാശയുള്ള അവകാശവാദമാണ് കോണ്ഗ്രസ് നടത്തുന്നതെന്നും മോഡി പറഞ്ഞു.
1984 ല് കേവലം രണ്ടു സീറ്റുകളുമായി പാര്ലമെന്റില് എത്തിയ പാര്ട്ടി ഇപ്പോള് ഭരിക്കുന്നത് 19 സംസ്ഥാനങ്ങള്. വളരെ വലിയ ഉയരത്തിലേക്കാണ് പാര്ട്ടി എത്തിയിരിക്കുന്നതെങ്കിലും വരും മാസങ്ങളില് വരാനിരിക്കുന്ന നിയമസഭാ 2019 പാര്ലമെന്റ് തെരഞ്ഞെടുപ്പ് എന്നീ കാര്യങ്ങളിലും വിജയം തുടരണമെന്നും അലംഭാവം കാട്ടരുതെന്നും മോഡി പ്രവര്ത്തകരെ ഓര്മ്മിപ്പിച്ചു. 2019 തെരഞ്ഞെടുപ്പില് വിജയം ലക്ഷ്യമിട്ട് ബൂത്തുതലം മുതലുള്ള പ്രവര്ത്തനം ഇപ്പോള് മുതല് ശക്തമാക്കണം എന്നും പറഞ്ഞു.
