ചണ്ഡീഗഡ്: സ്ത്രീപീഠനത്തിലൂടെ അറസ്റ്റിലാകുകയും 25 വര്ഷം തടവിന് ശിക്ഷിക്കപ്പെടുകയും ചെയ്ത മനുഷ്യദൈവം ഗുര്മീത് രാം റഹീം സിംഗ് അറസ്റ്റിലായ കേസില് ദേരാ സച്ചാ സൗദാ ആശ്രമത്തിന്റെ വക്താവിനെ പിടികൂടാന് പോലീസ് ഇനാം പ്രഖ്യാപിച്ചു. ഇയാളുമായി ബന്ധപ്പെട്ട വിവരം നല്കുന്നവര്ക്ക് രണ്ടുലക്ഷം രൂപയാണ് പാരിതോഷികം ഹരിയാന പോലീസ് പ്രഖ്യാപിച്ചിരിക്കുന്നത്.
രാംറഹീം അറസ്റ്റിലായതിനെ തുടര്ന്ന് ഹരിയാനയിലെ വിവിധ ഇടങ്ങളില് കലാപം നടത്തിയതിന്റെ മുഖ്യ ആസൂത്രകനാണ് ആദിത്യ ഇന്സാന്. കേസില് ഇനി പിടികൂടാനുള്ളത് ഇയാളെയും മൂന്ന് കൂട്ടാളികളെയുമാണ്. ഇതില് ഇന്സാനെ പിടികൂടാന് സഹായിക്കുന്നവര്ക്ക് രണ്ടു ലക്ഷം പ്രഖ്യാപിച്ച പോലീസ് മറ്റുള്ളവരുടെ വിവരങ്ങള് നല്കിയാല് 50,000 രൂപയും പ്രഖ്യാപിച്ചിട്ടുണ്ട്.
വിവരം നല്കുന്നവരുടെ കാര്യങ്ങള് രഹസ്യമായി സൂക്ഷിക്കുമെന്നും പോലീസ് പറഞ്ഞു. നേരത്തേ ഇന്സാനെ പിടികൂടാന് ഹരിയാന പോലീസ് ഒരു ലക്ഷം ഇനാം പ്രഖ്യാപിച്ചിരുന്നു. ഇതാണ് രണ്ടു ലക്ഷമാക്കി ഉയര്ത്തിയിരിക്കുന്നത്. രാം റഹീമിന്റെ സഹായി ഹണിപ്രീത് അറസ്റ്റിലായിരുന്നു.
