ഹൈദരാബാദ്: രാജ്യത്തെ ഏറ്റവും സമ്പന്നമായ ഹിന്ദു ക്ഷേത്രമായ തിരുപ്പതി വെങ്കിടേശ്വര ക്ഷേത്രത്തില് ജോലി ചെയ്യുന്ന അഹിന്ദുക്കളെ ഒഴിവാക്കാന് തിരുമല തിരുപ്പതി ദേവസ്ഥാനം അധികൃതര് ഒരുങ്ങുന്നു. ക്ഷേത്രത്തിന്റെ വിവിധ പ്രവൃത്തികളുമായി ബന്ധപ്പെട്ട് ജോലി ചെയ്യുന്ന 44 ജീവനക്കാരെയാണ് ഒഴിവാക്കുക.
തിരുമല തിരുപ്പതി ദേവസ്ഥാനം വിജിലന്സിന്റെ അന്വേഷണത്തില് കണ്ടെത്തിയ ജീവനക്കാരെയാണ് ദേവസ്വം ജോലിയില് നിന്ന് ഒഴിവാക്കുന്നത്. പകരം ഇവര്ക്ക് മറ്റ് സര്ക്കാര് വകുപ്പുകളില് സമാനമായ വേതന വ്യവസ്ഥയില് ജോലി നല്കും. ഒഴിവാക്കുന്നതില് 39 പേര്ക്ക് പെന്ഷനും മറ്റ് ആനുകൂല്യങ്ങള്ക്കും അര്ഹതയുള്ളവരാണ്. ബാക്കിയുള്ളവര് ദിവസവേതനത്തില് ജോലി ചെയ്യുന്നവരുമാണ്.
