മൂന്നാം തവണ എടുത്തപ്പോള് യുഎഇയിലെ ഭാഗ്യം ആലപ്പുഴക്കാരന് ഹരികൃഷ്ണനെ ചതിച്ചില്ല. അബുദാബി അന്താരാഷ്ട്ര വിമാനത്താവളത്തിന്റെ 'ബിഗ് ടിക്കറ്റ്' ഇത്തവണ മലയാളിക്ക് അടിച്ചപ്പോള് കിട്ടുന്നത് 21 കോടി രൂപയോളമാണ്. ഭാഗ്യക്കുറി അടിച്ചെന്ന് ആദ്യം കേട്ടപ്പോള് ആരോ പറ്റിക്കാന് വിളിക്കുകയാണെന്നാണ് ആദ്യം കരുതിയത്.
ആദ്യം രണ്ടു തവണ വിളി വന്നപ്പോഴും ഗൗരവമായി എടുക്കാതിരുന്ന ഹരികൃഷ്ണന് ചില റേഡിയോ സ്റ്റേഷനുകളും മാധ്യമങ്ങളും വിളിക്കാന് തുടങ്ങിയതോടെയാണ് ഭാര്യയോട് ലോട്ടറി വെബ്സൈറ്റില് കയറി ലോട്ടറി നമ്പര് നോക്കാന് ആവശ്യപ്പെട്ടത്. 'അടിച്ചു മോനെ' എന്ന് ഭാര്യ വിളിച്ചു പറഞ്ഞപ്പോഴാണ് ശരിക്കും ഞെട്ടിയത്. ഇപ്പോഴും വിശ്വസിക്കാനായിട്ടില്ലെന്നാണ് ഇയാളുടെ പക്ഷം.
ഫെബ്രുവരി 5 ന് കിട്ടുന്ന ഇത്രയും വലിയ സമ്മാനത്തുക എന്തു ചെയ്യണമെന്ന് പോലും ഇപ്പോഴും ഇയാള്ക്ക് അറിയില്ല. 500 ദിര്ഹം വിലയുള്ള ടിക്കറ്റ് മുമ്പ് രണ്ടു തവണ എടുത്തപ്പോഴും ഭാഗ്യം തുണച്ചിരുന്നില്ല. എന്നാല് ഇത്തവണ ശരിയായി. തന്റെ വിരമിക്കലിന് ശേഷം കുട്ടികളുടെ വിദ്യാഭ്യാസത്തിന് പണം മുടക്കാമെന്നാണ് ഇയാള് കരുതുന്നത്. യുഎഇ യിലാണ് താമസമെങ്കിലും ആലപ്പുഴയിലാണ് ഹരികൃഷ്ണന്റെ വേരുകള്. എട്ടു സഹോദരങ്ങളില് ഒരാളായി ജനിച്ച ഇയാള് ബിസിനസ് ചെയ്യുന്നു. വെള്ളിയാഴ്ച നാട്ടിലെത്തുന്നുണ്ട്.
