ഫരീദാബാദ്: ഇരുപത്തിരണ്ടുകാരിയെ തട്ടിക്കൊണ്ടുപോയി ഓടുന്ന വാഹനത്തിലിട്ട് കൂട്ടബലാത്സംഗം ചെയ്തു. ഹരിയാനയിലെ ഫരീദാബാദിലാണ് ശനിയാഴ്ച വൈകിട്ട് ഡല്ഹി നിര്ഭയമോഡല് ക്രൂര പീഡനം നടന്നത്.
ഇരുപത്തിരണ്ടുകാരിയായ യുവതി ജോലി കഴിഞ്ഞ് തിരികെ വീട്ടിലേയ്ക്ക് മടങ്ങി വരുന്ന വഴിയാണ് മൂന്നംഗ സംഘം വാഹനത്തിനുള്ളിലേയ്ക്ക് വലിച്ചുകയറ്റിയത്. ഓടുന്ന വാഹനത്തിനുള്ളിലേയ്ക്ക് യുവതിയെ വലിച്ചുകയറ്റി മൂന്നു പേര് ചേര്ന്ന് ക്രൂരമായി പീഡിപ്പിക്കുകയായിരുന്നു. നീണ്ടു രണ്ടു മണിക്കൂര് നേരം അതിക്രൂരമായി പീഡിപ്പിച്ചതിനു ശേഷം സിക്രി ഗ്രാമപ്രദേശത്തെ പെട്രോള് പമ്പിനു സമീപം യുവതിയെ ഉപേക്ഷിച്ച് സംഘം മുങ്ങുകയായിരുന്നു.
യുവതിയെ തട്ടിയെടുത്ത സ്ഥലത്തു നിന്ന് 20 കിലോമീറ്റര് അകലെയായിട്ടാണ് സംഘം ഉപേക്ഷിച്ചത്. സംഭവത്തില് ഇതുവരെ ആരെയും അറസ്റ്റ് ചെയ്തിട്ടില്ല. ശനിയാഴ്ച ഏഴു മണിയോടെയാണ് മൂന്നംഗ സംഘം എസ്യുവി വാഹനത്തിലേയ്ക്ക് യുവതിയെ വലിച്ചിഴച്ച് പീഡനത്തിന് ഇരയാക്കുകയായിരുന്നുവെന്ന് പോലീസ് പറയുന്നു. യുവതിയുടെ ശരീരത്തില് മുറിവുകളും, ചതവുകളും ഉള്ളതായും ക്രൈംബ്രാഞ്ച് ഉദ്യോഗസ്ഥന് വ്യക്തമാക്കി.
മെഡിക്കല് പരിശോധനയില് യുവതി പീഡനത്തിനിരയായതായി വ്യക്തമായിട്ടുണ്ട്. പോലീസ് എഫ്ഐആര് രജിസ്റ്റര് ചെയ്തു. സംഭവം അന്വേഷിക്കാന് പ്രത്യേക അന്വേഷണ സംഘത്തെ നിയോഗിച്ചിട്ടുണ്ട്. അതേ ദിവസം തന്നെ ഫരീദാബാദില് നിന്ന് 175 കിലോമീറ്റര് അകലെ ഒരു ആഴ്ച മുമ്പ്് കാണാതായ 15 വയസുകാരിയുടെ മൃതദേഹം പാതി നഗ്നമായ നിലയില് കണ്ടെത്തിയിരുന്നു.
