തിരുവനന്തപുരം: കണ്ണൂരില് ആര്.എസ്.എസ് പ്രവര്ത്തകന് കൊല്ലപ്പെട്ട സംഭവത്തെ അപലപിച്ച് ഗവര്ണര് പി. സദാശിവം. കണ്ണൂരിലെ കൊലപാതകം തന്നെ അസ്വസ്ഥനാക്കിയെന്നും സംഭവം സംസ്ഥാനത്തിന്റെ പ്രതിച്ഛായ തകര്ത്തുവെന്നും ഗവര്ണര് പറഞ്ഞു. ഇത്തരം സംഭവങ്ങള് ആവര്ത്തിക്കാതിരിക്കാന് പോലീസ് ജാഗ്രത കാണിക്കണം. രാഷ്ട്രീയ പാര്ട്ടികള് യോജിച്ച് സമാധാന ശ്രമങ്ങള് നടത്തണമെന്നും ഗവര്ണര് കൂട്ടിച്ചേര്ത്തു.
ആര്.എസ്.എസ് ശാഖാ മുഖ്യശിക്ഷക് ആയിരുന്ന ചിറ്റാരിപ്പറമ്പ് സ്വദേശി ശ്യാംപ്രസാദിനെ ഇന്നലെ വൈകിട്ടാണ് കൊലപ്പെടുത്തിയത്. സംഭവുമായി ബന്ധപ്പെട്ട് നാല് എസ്.ഡി.പി.ഐ പ്രവര്ത്തകര് അറസ്റ്റിലായിട്ടുണ്ട്. കണ്ണൂര് മുഴക്കുന്ന് പാറക്കണ്ടം പുത്തന്വീട്ടില് മുഹമ്മദ് (20), മിനിക്കേല് സലീം (26), നീര്വേലി സമീറ മന്സില് അമീര് (25), പാലയോട് തെക്കയില് ഷഹീം (39) എന്നിവരാണ് അറസ്റ്റിലായത്.
ഇക്കഴിഞ്ഞ 11ന് ചിറ്റാരിപ്പറമ്പില് ആര്.എസ്.എസ്-എസ്.ഡി.പി.ഐ സംഘര്ഷമുണ്ടായിരുന്നു. അന്ന് എസ്.ഡി.പി.ഐ പ്രവര്ത്തകനായ വാന് ഡ്രൈവര് അയൂബിന് വെട്ടേറ്റിരുന്നു. ഇതിന്റെ തുടര്ച്ചയാണ് ഇന്നലെ നടന്ന ആക്രമണം. കൊല്ലപ്പെട്ട ശ്യാംപ്രസാദ് ഈ സംഘര്ഷത്തില് ഉള്പ്പെട്ടിരുന്നതായാണ് റിപ്പോര്ട്ടുകള് സൂചിപ്പിക്കുന്നത്.
