തിരുവനന്തപുരം : പൊതുമരാമത്ത് പദ്ധതികളിലെ ക്രമക്കേടുകള് സംബന്ധിച്ചു വിജിലന്സ് അന്വേഷണം ശിപാര്ശ ചെയ്യാനുള്ള അധികാരം ജനകീയസമിതികള്ക്കു നല്കി സര്ക്കാര് ഉത്തരവിറക്കി. മരാമത്തുപദ്ധതികളിലെ അപാകതകള് കണ്ടെത്താനും ഏതുതരത്തിലുള്ള അന്വേഷണം നടത്തണമെന്നു ശിപാര്ശ ചെയ്യാനുമുള്ള അധികാരം എല്ലാ ജില്ലയിലും രൂപീകരിച്ച സാമൂഹിക ഓഡിറ്റ് സമിതികള്ക്കായിരിക്കും.
മരാമത്തുവകുപ്പിന്റെ പരിധിയിലുള്ള ദേശീയപാത, മറ്റു റോഡുകള്, പാലങ്ങള്, കെട്ടിടങ്ങള്, വകുപ്പിനു കീഴിലുള്ള മറ്റു സ്ഥാപനങ്ങള് മുഖേന നടപ്പാക്കുന്ന പദ്ധതികള് എന്നിവയിലെ ക്രമക്കേടുകള് ഇല്ലാതാക്കാനാണു ജില്ലാ സാമൂഹിക ഓഡിറ്റ് സമിതികള് രൂപീകരിച്ചത്. ജില്ലാപഞ്ചായത്ത് പ്രസിഡന്റാണു ചെയര്മാന്. നിര്മാണത്തില് അപാകതയുണ്ടെങ്കില് ഉന്നതോദ്യോഗസ്ഥരുടെ പരിശോധന ശിപാര്ശ ചെയ്യാനുള്ള അധികാരം സമിതിക്കായിരിക്കും. വകുപ്പുതല വിജിലന്സ്, ചീഫ് ടെക്നിക്കല് എക്സാമിനര്, ധനകാര്യ പരിശോധനാ വിഭാഗം എന്നിവയില് ഏതന്വേഷണം വേണമെന്നു സമിതിക്കു ശിപാര്ശ ചെയ്യാം.
നിലവില് പൊതുമരാമത്ത് പദ്ധതികളില് ക്രമക്കേടിനെക്കുറിച്ചു പരാതി ഉയര്ന്നാല് വകുപ്പുതല വിജിലന്സാണ് അന്വേഷിക്കുക. ക്രമക്കേട് കണ്ടെത്തിയാല് തുടരന്വേഷണത്തിനു വിജിലന്സ് ശിപാര്ശ ചെയ്യും. എന്നാല് ജനകീയസമിതികള്ക്ക് അധികാരം നല്കുന്നതോടെ കൂടുതല് കാര്യക്ഷമമമായ പരിശോധനയ്ക്കും വേഗത്തിലുള്ള അന്വേഷണത്തിനുമാണു വഴിയൊരുങ്ങുന്നത്.
കോര്പറേഷന് ഡെപ്യൂട്ടി മേയര്/ജില്ലാപഞ്ചായത്ത് വൈസ് പ്രസിഡന്റ്, രണ്ടു ജില്ലാപഞ്ചായത്ത് അംഗങ്ങള്, മുന്സിപ്പല് ചെയര്മാന്, വിരമിച്ച രണ്ടു സൂപ്രണ്ടിങ് എന്ജിനീയര്മാര് എന്നിവരാകും സമിതിയംഗങ്ങള്. പദ്ധതി ക്രമക്കേടു സംബന്ധിച്ച് ജില്ലയില് സ്ഥിരതാമസക്കാരായ ആര്ക്കും സമിതിയില് പരാതിപ്പെടാം. പ്രവൃത്തിസമയത്തോ പൂര്ത്തിയായി മൂന്നുമാസത്തിനകമോ പരാതി നല്കണം.
സമിതിയുടെ പ്രതിമാസയോഗത്തില് പരാതികള് അന്വേഷിക്കാന് സമയം നിശ്ചയിക്കണം. പരാതി പരിശോധനാസംഘത്തില് ഒരാള് എന്ജിനീയറായിരിക്കണം. ഇലക്ട്രിക്കല്, ഇലക്ട്രോണിക്, മെക്കാനിക്കല് പ്രവൃത്തികള് പരിശോധിക്കേണ്ടിവന്നാല് അതതു മേഖലയിലെ വിദഗ്ധനെക്കൂടി പരിശോധനാസമയത്ത് ഉള്പ്പെടുത്തണം. മുന്കൂട്ടി നിശ്ചയിക്കാതെയും സമിതി അംഗങ്ങള്ക്കു മരാമത്തുപണികള് പരിശോധിക്കാം.
പരിശോധനയില് ക്രമക്കേട് കണ്ടെത്തിയാല് സര്ക്കാരിനെ അറിയിക്കണം. സര്ക്കാര് അംഗീകരിക്കുന്നതിനു മുമ്പു ശിപാര്ശകള് പരസ്യപ്പെടുത്തപ്പെടുത്തരുത്. വന്ക്രമക്കേടാണെങ്കില് സ്വീകരിക്കേണ്ട നടപടികളും സര്ക്കാരിനെ അറിയിക്കണം.
ജനകീയപരിശോധനകളുമായി പൊതുമരാമത്ത് ഉദ്യോഗസ്ഥര് നിര്ബന്ധമായും സഹകരിക്കണം. പ്രവൃത്തികളുടെ എസ്റ്റിമേറ്റ്, മറ്റു രേഖകള് എന്നിവ സമിതി ചെയര്മാന് രേഖാമൂലം ആവശ്യപ്പെട്ടാല് നല്കണം. അവ പരിശോധിച്ചശേഷം ഉടന് മടക്കിനല്കണം. ജില്ലയില് നടക്കുന്ന എല്ലാ മരാമത്തുപണികളും ഒരുതവണയെങ്കിലും സമിതി പരിശോധിക്കണം. റോഡ്, കെട്ടിടം, പാലം നിര്മാണങ്ങള് മാസത്തിലൊരിക്കല് സമിതി പരിശോധിച്ച് റിപ്പോര്ട്ട് തയാറാക്കണം. പരാതി ലഭിച്ച് ഒരുമാസത്തിനകം പരിശോധനാ റിപ്പോര്ട്ട് സര്ക്കാരിനു നല്കണം.
