ദില്ലി: രജപുത്രന്മാരെ അധിക്ഷേപിക്കുന്നുവെന്ന ആരോപണമുയര്ത്തിയാണ് പദ്മാവത് എന്ന ചിത്രം വിവാദ ചിത്രമാക്കുകയും പരക്കെ അക്രമവും സംഘര്ഷവും അഴിച്ചുവിടുകയും ചെയ്തത്. സിനിമ കാണാതെ കര്ണിസേന ചിത്രത്തിനെതിരെ നടത്തിയ പ്രഹസനങ്ങള് മറന്നുകൊണ്ട് ചിത്രം കണ്ടതോടെ പ്രതിഷേധം ഇല്ലെന്ന് രജപുത്ര കര്ണിസേന.
സഞ്ജയ് ലീലാ ബന്സാലി ചിത്രം പദ്മാവതിന് എതിരെയുള്ള പ്രതിഷേധങ്ങള് അവസാനിപ്പിക്കുന്നതായി രജപുത്ര കര്ണി സേന. രജപുത്രന്മാരെ ചിത്രം അധിക്ഷേപിക്കുന്നില്ലെന്ന് ബോധ്യപ്പെട്ടതിനാലാണ് ചിത്രത്തിനെതിരെയുള്ള പ്രതിഷേധങ്ങള് അവസാനിപ്പിക്കുന്നത്.
ശ്രീ രാഷ്ര്ടീയ രജപുത്ര കര്ണി സേനയിലെ ചില അംഗങ്ങള് വെള്ളിയാഴ്ച മുംബൈയില് പ്രദര്ശിപ്പിച്ച ചിത്രം കണ്ടിരുന്നു. രജപുത്രന്മാരുടെ പ്രതാപവും ത്യാഗവുമാണ് ചിത്രം മഹത്വവല്ക്കരിക്കുന്നതെന്നും ഓരോ രജപുത്രനും ചിത്രം കണ്ടുകഴിയുമ്പോള് അഭിമാനം തോന്നുമെന്നും ചിത്രം കണ്ടതോടെ ഇവര്ക്ക് ബോധ്യപ്പെട്ടുവെന്നും വ്യക്തമാക്കി.
ഡല്ഹി സുല്ത്താന് അലാവുദ്ദീന് ഖില്ജിയും, റാണി പദ്മാവതിയും തമ്മില് ആക്ഷേപപരമായ സീനുകള് ഉണ്ടെന്ന അവകാശവാദത്തോടെ ആയിരുന്നു ചിത്രത്തിനെതിരെയുള്ള പരക്കെ അക്രമം. എന്നാല് ഇത്തരത്തില് ആക്ഷേപാര്ഹമായ സീനുകള് ചിത്രത്തിലില്ലെന്നും കര്ണിസേന പറയുന്നു. രാജസ്ഥാന്, മധ്യപ്രദേശ്, ഗുജറാത്ത് എന്നിവിടങ്ങളില് ചിത്രം റിലീസ് ചെയ്യുന്നതിന് വേണ്ട സഹായങ്ങളൊരുക്കുമെന്നും യോഗേന്ദ്ര സിംഗ് ഖട്ടര് വ്യക്തമാക്കി.
