ചെന്നൈ: മലയാളി ഗുണ്ടാത്തലവന്റെ ജന്മദിനം പൊളിക്കാന് എത്തിയ ഗുണ്ടാസംഘത്തെ ചെന്നൈ പോലീസ് സംഘം വേട്ടയാടിയ സംഭവത്തില് ചൊവ്വാഴ്ച രാത്രിയില് അരങ്ങേറിയത് സിനിമാ സ്റ്റൈല് ആക്ഷന് രംഗങ്ങള്. ബിനുവിനെ പൊക്കാന് പോലീസ് റെയ്ഡിന് പോലീസ് ഇട്ടിരുന്ന രഹസ്യ പേര് 'ഓപ്പറേഷന് ബര്ത്ത്ഡേ' എന്നായിരുന്നു. തിരുവനന്തപുരത്ത് നിന്നും തമിഴ്നാട്ടില് എത്തുകയും ചൂളൈമേട്ടില് താമസിക്കുകയും ചെയ്യുന്ന ദാവൂദ് ഇബ്രാഹീം എന്ന് പോലീസ് വിളിക്കുന്ന ബിനുവിനെ പക്ഷേ പിടികൂടാനായില്ലെന്ന് മാത്രം.
ചൊവ്വാഴ്ച രാത്രിയില് തുടങ്ങിയ റെയ്ഡ് ബുധനാഴ്ച രാവിലെ ഒമ്പതു മണിവരെ നീണ്ടു. എട്ടോളം കൊലപാതകക്കേസുകളില് പ്രതിയായ ബിനുവിന് പോലീസ് നല്കിയിരിക്കുന്ന പേര് ദാവൂദ് ഇബ്രാഹീം എന്നാണ്. ജന്മദിനാഘോഷത്തില് നടത്തിയ പോലീസ് ഇടപെടലില് നിന്നും പിടിച്ചെടുത്തത് എട്ടു കാറുകള്, 45 ബൈക്കുകള്, 88 മൊബൈല്ഫോണുകള്, വടിവാളുകള്, കത്തികള് എന്നിവയെല്ലാമാണ്. വേലു ലോറിത്താവളത്തിന് സമീപം സിനിമാ സ്റ്റൈല് ആക്ഷനായിരുന്നു പോലീസും ഗുണ്ടാസംഘങ്ങളും തമ്മിലുണ്ടായത്.
സിനിമയില് നിന്നും പ്രചോദനം കൊണ്ട് ആ രീതിയിലായിരുന്നു ബിനു ബര്ത്തഡേ പാര്ട്ടി നടത്തിയത്. പരിപാടികളില് പങ്കെടുക്കാന് എത്തിയ ഗുണ്ടകളില് പലര്ക്കും ബിനുവിനെ നേരിട്ടു പരിചയം പോലുമില്ലായിരുന്നു. അതു തന്നെ പോലീസിനും തുണയായി. കാറുകളിലും ഇരുചക്ര വാഹനങ്ങളിലുമായി 200 ലധികം പേര് ആഘോഷത്തിന് എത്തിയപ്പോള് രാത്രി ഏഴു മണിയോടെ സ്വകാര്യ കാറുകളിലായി പോലീസുകാരും വന്നു. റെയ്ഡിന് മുമ്പായി ആഘോഷത്തെക്കുറിച്ച് പോലീസ് മണത്തറിഞ്ഞിരുന്ന പോലീസ് പ്രത്യേക പദ്ധതി തയ്യാറാക്കി നേരത്തേ തന്നെ അനേകം പോലീസുകാരെ വേദിക്ക് സമീപം ഒളിവില് പാര്പ്പിച്ചിരുന്നു.
ഒരാഴ്ച മുമ്പ് വലയില് കുടുങ്ങിയ മദന് എന്ന ഗുണ്ടയാണ് ബിനുവിന്റെ പിറന്നാള് ആഘോഷത്തെക്കുറിച്ച് പോലീസിന് വിവരം നല്കിയത്. ബിനുവിന് വേണ്ടി നഗരത്തിലെ മുഴുവന് ഗുണ്ടകളും ഒത്തുകൂടുമെന്നായിരുന്നു ഇയാള് നല്കിയ വിവരം. ബിനുവിന്റെ ജന്മദിനത്തില് ഗുണ്ടകളെ പൊക്കാന് പോലീസും സജ്ജമായി. ചെന്നൈ സിറ്റി പോലീസ് കമ്മീഷണര് എ കെ വിശ്വനാഥനും ഡപ്യൂട്ടി എസ് സര്വേശുമായിരുന്നു പദ്ധതികള് തയ്യാറാക്കിയത്. മാങ്ങാനം, കുണ്ട്രത്തൂര്, പുനമല്ലി, നസ്രത്ത്പേട്ട്, പോരൂര് തുടങ്ങിയ സ്റ്റേഷനില് നിന്നുള്ള പോലീസുകാരെ കൂടി വരുത്തി ഓപ്പറേഷന് ബര്ത്ത്ഡേ എന്ന പേരും നല്കി.
പോലീസ് നേരത്തേ തന്നെ പിറന്നാളാഘോഷ വേദിക്ക് സമീപം മറഞ്ഞിരുന്നു. വടിവാള് ഉപയോഗിച്ച് കേക്ക് മുറിച്ചതോടെയായിരുന്നു ആഘോഷം തുടങ്ങിയത്. ഇതിന് മാറ്റു കൂട്ടാന് മദ്യവും ബിരിയാണിയും. ആഘോഷം പൊലിക്കുന്നതിനിടയില് തോക്കുമായി പോലീസ് ചാടിവീണതോടെയാണ് പലര്ക്കും കാര്യം പോലും മനസ്സിലായത്. തോക്കുചൂണ്ടി ആള്ക്കാരെ പിടിക്കാന് തുടങ്ങിയപ്പോള് ഗുണ്ടകള് ചിതറിയോടി.
പോലീസിന്റെ സാന്നിദ്ധ്യം രഹസ്യകോഡ് ഉപയോഗിച്ചായിരുന്നു ഗുണ്ടാ സംഘങ്ങള് കൈമാറിയത്. എന്നാല് പോലീസിനൊപ്പം സമീപത്തെ നാട്ടുകാര് കൂടി ചേര്ന്നതോടെ ഒളിച്ചിരുന്നവര് പോലും പിടിയിലായി. ആഘോഷവേദിക്ക് സമീപത്തെ തടാകമാണ് പലര്ക്കും തുണയായത്. ഇതില് ചാടിയ പലരും നീന്തി രക്ഷപ്പെടുകയായിരുന്നു. കൂട്ടത്തില് ബിനുവും അനുയായികളും രക്ഷപ്പെട്ടു.
