ഏറ്റുമാനൂര്(കോട്ടയം): ഏറ്റുമാനൂര് മഹാദേവ ക്ഷേത്രത്തിലെ ആറാട്ട് വരവേല്പ്പിനിടയില് ആന ഇടഞ്ഞുണ്ടായ തിക്കിലും തിരക്കിലും പെട്ട് 8 പേര്ക്ക് പരിക്കേറ്റു. ഇവരെ കോട്ടയം മെഡിക്കല് കോളേജില് പ്രവേശിപ്പിച്ചു. ആര്ക്കും ഗുരുതരമായ പരുക്കുകളില്ല . ആനപ്പുറത്തുണ്ടായിരുന്ന യുവാവിനെ ഫയര്ഫോഴ്സും നാട്ടുകാരും ചേര്ന്ന് അത്ഭുതകരമായി രക്ഷപ്പെടുത്തി.
ഇന്നു പുലര്ച്ചെയായിരുന്നു സംഭവം. മാവേലിക്കര സ്വദേശിയുടെ ഗണപതി എന്ന ആനയാണ് ഇടഞ്ഞത്. ആറാട്ട് എതിരേല്പിനായി ക്ഷേത്രത്തിന്റെ പടിഞ്ഞാറേ നടയ്ക്ക് അടുത്തുള്ള കല്യാണമണ്ഡപത്തില് പ്രവേശിക്കുന്നതിനിടെ ഗണപതിയെ പിന്നിലുണ്ടായിരുന്ന മറ്റൊരു ആന കുത്തുകയായിരുന്നു. ഇതോടെ ഇടഞ്ഞ ഗണപതി തന്റെ പുറത്തുണ്ടായിരുന്ന യുവാവിനെ കുലുക്കി താഴെയിടാന് ശ്രമിച്ചു. ഇതിനിടെ സമയോചിതമായി ഇടപെട്ട ഫയര്ഫോഴ്സും നാട്ടുകാരും ചേര്ന്ന് കല്യാണ മണ്ഡപത്തിന് മുകളിലത്തെ നിലയില് നിന്നും വടം ഉപയോഗിച്ച് യുവാവിനെ രക്ഷപ്പെടുത്തി. യുവാവ് വടത്തില് തൂങ്ങി രക്ഷപ്പെടുന്നതിനിടയിലും ആന ഇയാളെ ആക്രമിക്കാന് ശ്രമിച്ചെങ്കിലും അത്ഭുതകരമായി രക്ഷപ്പെടുകയായിരുന്നു.
തുടര്ന്ന് ആന ആള്ക്കൂട്ടത്തിനിടയിലേക്ക് കയറാന് ശ്രമിച്ചതോടെ ജനം ചിതറിയോടി. ഈ തിക്കിലും തിരക്കിലുമാണ് എട്ടു പേര്ക്ക് പരുക്കേറ്റത്. ഇവരെ കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ചു. പിന്നീട് ആനയെ മയക്കുവെടി വച്ച് തളച്ചു. ആന ഇടഞ്ഞതോടെ ആറാട്ട് എഴുന്നള്ളിപ്പ് ഏറെ വൈകിയാണ് ക്ഷേത്രത്തില് എത്തിയത്.
