ന്യൂഡല്ഹി: കെ എം മാണിയെയും കോണ്ഗ്രസിനെയും എതിര്ത്ത് സംസാരിച്ച രാജ്യസഭാംഗം വി മുരളീധരനെതിരേ നിലപാട് എടുത്തതിന് തൊട്ടു പിന്നാലെ ചെങ്ങന്നൂര് ബിജെപി സ്ഥാനാര്ത്ഥി ശ്രീധരന്പിള്ളയുടെ അടിയന്താരാവസ്ഥയെ ക്കുറിച്ചുള്ള പുസ്തകം എക്സ്പ്രസ് വേഗതയില് പ്രകാശനം ചെയ്യാനൊരുങ്ങി ഇന്നു പ്രധാനമന്ത്രി. പാര്ലമെന്റിലെ പ്രധാനമന്ത്രിയുടെ ഓഫീസില് വെച്ചാണ് ചടങ്ങ്. ഇന്നലെ ഉച്ചയോടെ പ്രധാനമന്ത്രിയുടെ ഓഫീസ് നേരിട്ടു വിളിച്ചാണ് ഡല്ഹിയില് പുസ്തക പ്രകാശനത്തിന് എത്താന് ശ്രീധരന് പിള്ളയോട് ആവശ്യപ്പെട്ടത്.
ശ്രീധരന് പിള്ളയൊടൊപ്പം ബിജെപി സംസ്ഥാന അദ്ധ്യക്ഷന് കുമ്മനം രാജശേഖരനും ബിജെപി നേതാവ് പി കെ കൃഷ്ണദാസും ഡല്ഹിയില് എത്തിയിട്ടുണ്ട്. കെ എം മാണിയുമായുള്ള ബന്ധത്തിന്റെ പേരില് രാജ്യസഭാംഗം വി മുരളീധരന് എടുത്ത നിലപാടിനെതിരേ പി കെ കൃഷ്ണദാസും ശ്രീധരന് പിള്ളയും രംഗത്ത് വന്നിരുന്നു. ഇതിന് പിന്നാലെയാണ് പ്രധാനമന്ത്രിയുടെ ഓഫീസ് തന്നെ ശ്രീധരന്പിള്ളയെ നേരിട്ട് വിളിച്ചതും പുസ്തക പ്രകാശനത്തിന് എത്താന് പറഞ്ഞിരിക്കുന്നതും.
പ്രധാനമന്ത്രിയുമായുള്ള ബിജെപി നേതാക്കളുടെ കൂടിക്കാഴ്ചയില് ചെങ്ങന്നൂരിലെ രാഷ്ട്രീയസാഹചര്യങ്ങള് ചര്ച്ചയാകുമെന്നാണ് സൂചന. പ്രധാനമന്ത്രിക്ക് പുറമേ ബി.ജെ.പി. കേന്ദ്രനേതാക്കളെയും ശ്രീധരന്പിള്ള കാണുന്നുണ്ട്. കഴിഞ്ഞ ദിവസമാണ് കെ എം മാണിയെ ബിജെപി നേതാവ് വി മുരളീധരന് കള്ളനും കൊള്ളക്കാരനുമെന്ന് വിശേഷിപ്പിച്ചത്. എന്നാല് പിന്നീട് കോര്കമ്മറ്റിയില് നിന്നും രൂക്ഷ വിമര്ശനം നേരിടുകയും പാര്ട്ടിയില് ഒറ്റപ്പെടുകയും ചെയ്ത സാഹചര്യത്തില് തിരുത്തുകയും ചെയ്തു.
ചെങ്ങന്നൂര് ഉപതെരഞ്ഞെടുപ്പില് എന്.ഡി.എ. സ്ഥാനാര്ഥിയായ അഡ്വ: പി.എസ്. ശ്രീധരന്പിള്ള മുരളീധരന്റെ പ്രസ്താവനയ്ക്കെതിരേ ശക്തമായി രംഗത്ത വന്നിരുന്നു. പാര്ട്ടിക്ക് പരാതി നല്കുകയും ചെയ്തു. വി മുരളീധരന്റെ പ്രസ്താവന ചെങ്ങന്നൂര് ഉപ തെരഞ്ഞെടുപ്പില് പ്രതിസന്ധി ഉണ്ടാക്കുമെന്നായിരുന്നു പരാതിയില് പറഞ്ഞിരുന്നത്. ഇതേ തുടര്ന്ന് പ്രസ്താവന മാറ്റണമെന്ന് സംസ്ഥാന അദ്ധ്യക്ഷന് കുമ്മനം രാജശേഖരന് വി മുരളീധരനോട് ആവശ്യപ്പെടുകയും എല്ലാവരുടേയും വോട്ടുകള് ബിജെപിയ്ക്ക് വേണമെന്ന് നിലപാട് എടുക്കുകയും ചെയ്തിരുന്നു. ആവശ്യം കഴിഞ്ഞശേഷം കലമിട്ട് ഉടയ്ക്കുന്ന സമീപനമാണ് മുരളീധരന്റേത് എന്നായിരുന്നു കോര് കമ്മറ്റിയിലെ വിമര്ശനം.
മുരളീധരനെ വിമര്ശിച്ച് കേരളാകോണ്ഗ്രസും രംഗത്ത് വന്നു. ചെങ്ങന്നൂരില് പരാജയം ഉറപ്പുവരുത്തുകയാണ് മുരളീധരന്റെ ഉദ്ദേശമെന്നായിരുന്നു കേരളാ കോണ്ഗ്രസിന്റെ വിമര്ശനം. ബിജെപിയിലെ തമ്മിലടിക്ക് കേരളാകോണ്ഗ്രസിനെ കരുവാക്കരുതെന്നും പറഞ്ഞു. അടിയന്തിരാവസ്ഥയുടെ നാല്പ്പതാം വാര്ഷികം പ്രമാണിച്ച് ശ്രീധരന്പിള്ള രചിച്ച ''അടിയന്തിരാവസ്ഥയിലെ കറുത്ത നാളുകള്'' എന്ന ഇംീഷ് പുസ്തകം ഉച്ചയ്ക്ക് 12 നാണ് പ്രധാനമന്ത്രി നരേന്ദ്രമോഡി പ്രകാശനം ചെയ്യുന്നത്. മാര്ത്തോമ്മാ സഭയുടെ ഡല്ഹി ബിഷപ് ഗ്രിഗോറിയോസ് മാര് സ്റ്റെഫാനോസ് എപ്പിസ്കോപ്പ പുസ്തകം ഏറ്റുവാങ്ങും.
