സംസ്ക്കാര-വര്ണ്ണ-വര്ഗ്ഗ വൈവിദ്ധ്യങ്ങള്ക്കപ്പുറത്ത് ഉദാത്തമായ സ്നേഹത്തിന് ഭാഷയോ വേഷമോ തടസ്സമല്ലെന്ന് പറഞ്ഞ സിനിമയുടെ നായകന് ഒടുവില് വഞ്ചന ആരോപണം ഉന്നയിച്ച് രംഗത്തു വന്ന സുഡാനി ഫ്രം നൈജീരിയ സിനിമ കൂടുതല് വിവാദത്തിലേക്ക്. തനിക്ക് ലഭിച്ചത് മറ്റ് നടന്മാര്ക്ക് നല്കിയതിനേക്കാള് കുറഞ്ഞ തുകയെന്ന ആരോപണവുമായി സിനിമയിലെ നൈജീരിയന് നടന് സാമുവല് അബിയോള റോബിന്സണാണ് വെടി പൊട്ടിച്ചിരിക്കുന്നത്. പക്ഷേ സിനിമയുടെ അണിയറക്കാര് ഇതുവരെ പ്രതികരിച്ചിട്ടില്ല.
സിനിമയിലെ പുതുമുഖങ്ങള്ക്ക് പോലും അഞ്ചു ലക്ഷം രൂപ പ്രതിഫലം നല്കിയപ്പോള് തനിക്ക് കിട്ടിയത് വെറും മൂന്ന് ലക്ഷം രൂപയാണ്. ഇത് തനിക്ക് നൈജീരിയയില് കിട്ടുന്ന പ്രതിഫലത്തേക്കാള് കുറവാണ്. ലോ ബജറ്റ് ചിത്രമായതിനാലാണ് കുറഞ്ഞ പ്രതിഫലത്തിന് അഭിനയിക്കാന് സമ്മതിച്ചതും പ്രതിഫലത്തില് കണക്കു പറയാഞ്ഞതും. സിനിമയിലെ പല പുതിയ താരങ്ങള്ക്കും കിട്ടിയതിനേക്കാള് കുറവാണ് തനിക്ക് കിട്ടിയത്. താന് ഒരു പുതുമുഖ താരമല്ല. നൈജീരിയയില് 18 ചിത്രങ്ങള് അഭിനയിച്ച പരിചയമുള്ളയാളാണ്. തന്നോട് ഈ രീതിയിലുള്ള പെരുമാറ്റം വിവേചനം തന്നെയാണ്.
പടം വിജയിച്ചാല് കൂടുതല് പ്രതിഫലം തരാമെന്ന് പറഞ്ഞിരുന്നെങ്കിലും ആരും ഉറപ്പ് പാലിച്ചില്ല. ഈ ഉറപ്പിന്മേലാണ് ഷൂട്ടിംഗ് തീര്ന്നിട്ടും പ്രമോഷന് പരിപാടികളുമായി ഇന്ത്യയില് തുടര്ന്നത്. എന്നാല് നൈജീരിയയില് എത്തിയ ശേഷമാണ് സിനിമ വന് ഹിറ്റാണെന്ന് മനസ്സിലായത്. എന്നാല് സിനിമയുടെ അണിയറക്കാര് ഉറപ്പ് പാലിക്കാന് മുമ്പോട്ട് വന്നിട്ടില്ല. ഇതിനെ വംശീയ വിവേചനമെന്നാണ് ഞാന് വിളിക്കുക.
സിനിമയുടെ വിജയം തന്റെ കൂടി വിജയമാണ്. സിനിമയെയും താരങ്ങളെയും ആരാധകര് ഏറ്റെടുത്തു കഴിഞ്ഞു. കൊച്ചിയിലെ പല തീയറ്റിലും താന് എത്തി സിനിമകണ്ടതും സിനിമയ്ക്ക് പ്രമോഷന് ആയി മാറിയിട്ടുണ്ട്. സിനിമ ബോക്സോഫീസില് ഹിറ്റായിക്കൊണ്ടിരിക്കുന്നു. പ്രതിഫലം കുറച്ച നടപടി വിവേചനം തന്നെയാണെന്നും സാമുവല് പറഞ്ഞു. നൈജീരിയയില് എത്തിയ ശേഷം നടത്തിയ ഫേസ്ബുക്ക് പോസ്റ്റിലൂടെയാണ് അബിയോള ഇക്കാര്യം വ്യക്തമാക്കിയത്. അതേസമയം സിനിമയുടെ അണിയറക്കാര് ആരും തന്നെ അബിയോളയുടെ പ്രസ്താവനയോട് ഇതുവരെ പ്രതികരിച്ചിട്ടില്ല. ഇക്കാര്യത്തില് പ്രതികരിക്കാന് വാര്ത്താസമ്മേളനം വിളിച്ചിട്ടുണ്ട്.
