കോട്ടയം : രാജ്യത്ത് ആദ്യമായി ട്രാന്സ്ജെന്ററുകള്ക്കായി തുടങ്ങിയ ക്ലിനിക്കിന്റെ പ്രവര്ത്തനം അനിശ്ചിതത്വത്തില്. ആവശ്യത്തിന് ഡോക്ടര്മാര് ഇല്ലാത്തതിനാലാണ് കോട്ടയം മെഡിക്കല് കോളജില് ട്രാന്സ്ജെന്ററുകള്ക്കായി തുടങ്ങിയ ക്ലിനിക്കിന്റെ പ്രവര്ത്തനം അനിശ്ചിതത്വത്തിലായിരിക്കുന്നത്.
ഒരു വര്ഷമായിട്ടും ക്ലിനിക്കില് എന്ഡോക്രൈനോളജിസ്റ്റിനെ നിയമിച്ചിട്ടില്ല. ഇതിനിടെ ക്ലിനിക്ക് തുടങ്ങിയപ്പോള് മുതലുള്ള മനശാസ്ത്രജ്ഞനെ മാറ്റിയതിനെതിരെ ട്രാന്സ്ജെന്ഡറുകള് രംഗത്തെത്തി. ആദ്യത്തെ രണ്ടു മാസം ഇവിടെ സേവനംചെയ്ത ഇന്ത്യന് ഇന്സ്റ്റിറ്റ്യൂട്ട് ഓഫ് ഡയബറ്റിക്സിലെ ഡോക്ടര്ക്ക് നിയമനം നല്കണമെന്ന് ആശുപത്രി അധികൃതര് ആവശ്യപ്പെട്ടിട്ടും നടപടി ഉണ്ടായില്ലെന്നു മാത്രമല്ല, ഇതിനിടെ ഇവിടുത്തെ മനശാസ്ത്രജ്ഞന് ഡോ.വര്ഗീസ് പുന്നൂസിനെ ആലപ്പുഴയിലേയ്ക്കും മാറ്റി.
എല്ലാ മാസവും ആദ്യത്തെ ചൊവ്വാഴ്ച പ്രവര്ത്തിക്കുന്ന ക്ലിനിക്കില് മറ്റ് വിഭാഗത്തിലെ ഡോക്ടര്മാരെ നിയമിച്ചുവെങ്കിലും എന്ഡോക്രൈനോളജിസ്റ്റിനെ മാത്രം നിയമിച്ചില്ല.
എല്ലാ ആശുപത്രികളിലും ഇത്തരം ക്ലിനിക്കുകള് സ്ഥാപിക്കണമെന്നാണ് സര്ക്കാര് പ്രഖ്യാപനം. എന്നാല്, ആദ്യം തുടങ്ങിയ ക്ലിനിക്ക് തന്നെ പാതിവഴിയിലായ സാഹചര്യമാണ് നിലവിലുള്ളത്.
