ന്യൂഡല്ഹി: രാജ്ഘട്ടില് കോണ്ഗ്രസ് നിരാഹാരസമരം തുടങ്ങുന്നതിനു മുമ്പ് നേതാക്കള് സമൃദ്ധമായ ഭക്ഷണം കഴിക്കുന്ന ദൃശ്യങ്ങള് െവെറല്. ദളിതുകള്ക്കു നേരേയുള്ള അക്രമങ്ങളില് പ്രതിഷേധിച്ച് കോണ്ഗ്രസ് നടത്തുന്ന സാമുദായിക സൗഹാര്ദ സദസിനു മുമ്പാണു പാര്ട്ടി ഡല്ഹി അധ്യക്ഷന് അജയ് മാക്കന് ഉള്പ്പെടെയുള്ള നേതാക്കള് ഹോട്ടലില്നിന്നു ഭക്ഷണം കഴിച്ചത്.
ബി.ജെ.പി. നേതാവ് ഹരീഷ് ഖുറാനയാണു ചിത്രം ട്വിറ്ററില് പങ്കുവച്ചത്. ''കോണ്ഗ്രസ് നേതാക്കള് ജനങ്ങളെ നിരാഹരസമരത്തിലേക്ക് ക്ഷണിച്ചുകൊണ്ട് റസ്റ്റോറന്റിലിരുന്ന് ബട്ടൂരയും കടലക്കറിയും കഴിക്കുകയാണ്'' എന്നായിരുന്നു ഖുറാനയുടെ ട്വീറ്റ്. ''ഫീസ്റ്റ് ബിഫോര് ഫാസ്റ്റ്''-(നിരാഹാരത്തിനു മുമ്പ് വിരുന്ന്) എന്ന അടിക്കുറിപ്പോടെയായിരുന്നു പോസ്റ്റ് ചെയ്തത്. ഹോട്ടലില് ഭക്ഷണം കഴിക്കാനിരുന്ന അതേ വസ്ത്രത്തോടെ, പാര്ട്ടി അധ്യക്ഷന് രാഹുല് ഗാന്ധിക്കൊപ്പം ഇവര് വേദിയിലിരിക്കുന്ന ചിത്രങ്ങളും ഖുറാന പോസ്റ്റ് ചെയ്തിരുന്നു.
എന്നാല്, ആരോപണം കോണ്ഗ്രസ് നിഷേധിച്ചു. അനിശ്ചിതകാല നിരാഹാരസമരത്തിനല്ല പാര്ട്ടി ആഹ്വാനം ചെയ്തത്. 10.30 മുതല് 4.30 വരെയായിരുന്നു സമരം. രാവിലെ എട്ടു മണിയോടെയാണ് തങ്ങള് ചാന്ദ്നിച്ചൗക്കിലെ ചായ്ന റാം സ്വീറ്റ്സ് എന്ന റെസ്റ്റോറന്റില്നിന്നു ഭക്ഷണം കഴിച്ചതെന്നും കോണ്ഗ്രസ് നേതാവ് അരവിന്ദര് ലവ്ലി പ്രതികരിച്ചു.
